Rajoni

Kosova në Hagë/ Presidenti Thaçi jep dorëheqjen: Mu komunikua akt-akuza! Zëvendësohet përkohërisht nga Vjosa Osmani (Bashkë me të edhe Kadri Veseli e Rexhep Selimi)

VIDEO
  • Gjithë rastet e Kosovës që kanë përfunduar tek Gjykata Speciale në Hagë
  • Vjosa Osmani flet si Presidente: Serbia kreu krime në Kosovë, të mos barazohet viktima me agresorin
  • Kush është Vjosa Osmani, nëna e dy fëmijëve që la gjurmë në politikën e Kosovës, sot u caktua presidente
  • PROFIL/ Kush është Hashim Thaçi, si lindi pseudonimi “Gjarpri”
  • Kosova në Hagë. Presidenti Hashim Thaçi ka dhënë dorëheqjen dhe pritet të niset drejt Hagës. Bashkë me të niset edhe Rexhep Selimi e Kadri Veseli. Për të tre është konfirmuar akt-akuza. Priten të tjera arrestime.
    Featured image of article: Kosova në Hagë/ Presidenti Thaçi jep dorëheqjen: Mu komunikua akt-akuza! Zëvendësohet përkohërisht nga Vjosa Osmani (Bashkë me të edhe Kadri Veseli e Rexhep Selimi) Hashim Thaçi, Kadri Veseli dhe Vjosa Osmani

     KOSOVË–Vjosa Osmani emërohet presidente e Kosovës, pas dorëheqjes së Presidentit të Kosovës Hashim Thaçi. Presidenti i Kosovës, Hashim Thaçi pasi konfirmoi aktakuzën e ngritur nga Dhoma e Specializuara në Hagë, ka bërë me dije edhe dorëheqjen e tij nga posti i Presidentit. Përpara mediave, Thaçi tha se në Hagë nuk mund të shkojë Presidenti i Kosovës, e për këtë gjë, ka dhënë edhe dorëheqjen. Ai premtoi se nga Haga, do të kthehet faqebardhë, pavarësisht akuzave për krime lufte. Ndërsa Osmani i është drejtuar popullit me një fjalim të shkurtër si presidente, duket kërkuar që të gjithë të qëndrojnë të bashkuar duke vënë theksin edhe njëherë tek krimet që Serbia ka kryer në Kosovë.  Tashmë Thaçi pritet që të niset për në Hagë, pasi shkoi vetë këtë mesditë në zyrat e EULEX në Kosovë. Më herët, për në Hagë është nisur edhe kreu i Partisë Demokratike Kosovare, Kadri Veseli, bashkë me ish-komandantin e UÇK-së Rexhep Selimi, njëherësh kreu i grupit parlamentar të Vetëvendosjes.

    Vetë Veseli përmes statusi në rrjetet sociale shkroi se do të shkojë vetë në Hagë për t’iu përgjigjur akuzave, por megjithatë nuk ka dhënë të tjera detaje rreth akuzave. Edhe Veseli u tërhoq nga të gjitha detyrat politike dhe publike duke shkuar në Hagë si qytetar i thjeshtë. Pak para nisjes për në Hagë, Rexhep Selimi dhe disa deputetë të Vetëvendosjes sipas mediave kosovare, kanë kryer homazhe në varrin e aktivistit Astrit Dehari.

    Për më shumë bëhu pjesë e grupit më viral në Facebook, Dosja.al

    Lajmi i dorëheqjes së Thaçit ka shkaktuar një valë reagimesh. Presidenti Ilir Meta, shprehet optimist se lufta e Kosovës do të dalë kryelartë nga kjo betejë. 

    Dje u arrestua ish-parlamentari Jakup Krasniqi nga EULEX. Krasniqi akuzohet nga Dhomat e Specializuara për krime lufte gjatë Luftës së Kosovës. Sot iu komunikua akt-akuza dhe Kadri Veselit, kryetar i PDK-së dhe, Rexhep Selimi, kryetar i grupit parlamentar të Vetëvendosjes. Kosova është në ‘dridhje’ nga akuzat e Hagës, ku priten arrestime të tjera në ditët në vijim.

    (a.k;i.a;f.m/dosja.al)

    • 22:35

      Jakup Krasniqi i prangosur në Hagë, caktohet dita kur do të dalë para Gjykatës Speciale

      Jakup Krasniqi

      Ish-kryetari i Kuvendit të Kosovës, Jakup Krasniqi është prangosur dhe është vendosur në dhomat e paraburgimit do të dalë para Gjykatës Speciale, ditën e hënë. Mësohet se seanca dëgjimore ndaj tij do të fillojë nga ora 11:00, ndërkohë që nuk nuk dihen detaje për të prangosurit e tjerë. 

    • 21:58

      I prangosur dhe brenda paraburgimit në Hagë/ Thaçi përcjell një mesazh pa “fjalë”, shfaqet i rrethuar nga qytetarët e Kosovës

      Hashim Thaçi

      Ish-presidenti i Kosovës Hashim Thaçi, ditën e sotme ka mbërritur në Gjykatën e Hagës, për t’u përballur me aktakuzat e ngritura ndaj tij. U tha se ai ishte në paraburgim mirëpo Thaçi ka reaguar në rrjetet sociale.

      Një orë më parë ai ka dhënë një mesazh nga Haga. Ish- presidenti ka ndryshuar foto coverit të tij në Facebook, në të cilin ka vendosur një fotografi të muajit korrik pas kthimit të tij nga Haga, moment kur ai u prit nga shumë qytetarë të Kosovës si hero i vendit.

    • 22:07

      Aktakuza e Gjykatës Speciale përmend edhe Fatmir Limajn, PUBLIKOHEN edhe emrat e ish-ushtarëve të tjerë të UÇK-së

      Foto ilustruese

      Gjykata Speciale ka pubblikuar emrat e zyrtarëve të tjerë UÇK-së që i konsideron si “pjesë të grupit kriminal” bashkë me ish-zyrtarët e tjerë. Përveç ish-presidentit Hashim Thaçi, dy ish-kryeparlamentarëve Kadri Veseli e Jakup Krasniqi dhe Rexhep Selimi, janë publikuar edhe emrat e të tjerëve. Bëhet fjalë për ish-luftëtarët: Azem Syla, Lahi Brahimaj, Fatmir Limaj, Sylejman Selimi, Rrustem Mustafa, Shukri Buja, Latif Gashi dhe Sabit Geci. Të gjithë të sipërpërmendurit sipas Speciales janë përdorur nga “kokat” e prangosura për të kryer krime ndaj civilëve që nuk kishin lidhje me luftën. Megjithatë aktakuza përmend edhe Fatmir Limajn.

      “35. Anëtarët e tjerë të ndërmarrjes së përbashkët kriminale përfshinin Azem SYLA, Lahi BRAHIMAJ, Fatmir LIMAJ, Sylejman SELIMI, Rrustem MUSTAFA, Shukri BUJA, Latif GASHI dhe Sabit GECI, si dhe disa politikë të tjerë të UÇK-së udhëheqësit ushtarakë, përfshirë anëtarët e tjerë të Shtabit të Përgjithshëm; Ministrat dhe zv ministrat; Komandantët e zonës së UÇK-së, zëvendëskomandantët e zonës dhe anëtarët e tjerë të shtabet e komandës së zonës; komandantët e brigadave dhe njësive; komandantët dhe anëtarët e shërbimet e policisë dhe inteligjencës së UÇK-së; ushtarë të tjerë të UÇK-së ; dhe të tjerët që veprojnë në emër të UÇK-së (së bashku me Hashim THAÇI, Kadri VESELI, Rexhep SELIMI dhe Jakup KRASNIQI, kolektivisht). Secili prej këtyre individëve, me veprimet ose mosveprimet e tij ose të saj, kontribuoi në arritjen e qëllimit të përbashkët. Përndryshe, disa ose të gjithë këta individë ishin jo anëtarë të ndërmarrjes së përbashkët kriminale, por janë përdorur nga anëtarët e përbashkët ndërmarrje kriminale për të kryer krime të kryera në përparim të së përbashkëtës qëllimi (së bashku me Anëtarët e JCE, kolektivisht Anëtarët dhe Mjetet e JCE ’),”-shkruhet në aktakuzën e publikuar.

    • 21:32

      Konfirmohen aktakuzat ndaj Thaçit, Veselit, Krasniqit dhe Selimit, prangosen dhe përfundojnë në paraburgim. Gjykata: Vrasje dhe tortura mbi civilë

      Foto ilustruese

      Publikohen aktakuzat ndaj ish-luftëtarëve të Ushtrisë Çlirimtare të Kosovës. Mbrëmjen e sotme, gjykatësi i procedurës paraprake i Dhomave të Specializuara konfirmon aktakuzën kundër ish-presidentit Hashim Thaçit, dy ish-kryeparlamentarëve Kadri Veselit, Jakup Krasniqit dhe Rexhep Selimit. Në një deklaratë zyrtare për mediat, Gjykata Speciale ka bërë me dije se të gjithë janë arrestuar dhe aktualisht ndodhen në dhomat e paraburgimit. Të katër zyrtarët më të lartë të Kosovës, akuzohen për arrestim të paligjshëm, vrasje dhe torturë, të cilat konsiderohen si krime lufte.  Në aktakuzën e publikuar shkruhet se nga marsi i vitit 1998 deri në shtator të një viti më vonë, në Kukës dhe Cahan janë kryer krime ndaj qindra civilëve që nuk ishin pjesë e luftës së UÇK-së.

      Midis marsit 1998 dhe shtatorit 1999 u kryen krimet e luftës të arrestimit dhe ndalimit të paligjshëm ose arbitrar, trajtimit mizor, torturës dhe vrasjes së paligjshme dhe krimet kundër njerëzimit të burgosjes, akteve të tjera çnjerëzore, torturës, vrasjes së paligjshme, zhdukjes me forcë të personave dhe përndjekjes. Krimet që paraqiten në aktakuzë u kryen në disa vende në Kosovë si edhe në Kukës dhe Cahan në Shqipërinë Veriore dhe u kryen nga anëtarë të Ushtrisë Çlirimtare të Kosovës (“UÇK”) kundër qindra civilëve dhe personave që nuk merrnin pjesë aktive në luftime,”-shkruhet në aktakuzë.

      Aktakuza e konfirmuar:

      Midis marsit 1998 dhe shtatorit 1999 u kryen krimet e luftës të arrestimit dhe ndalimit të paligjshëm ose arbitrar, trajtimit mizor, torturës dhe vrasjes së paligjshme dhe krimet kundër njerëzimit të burgosjes, akteve të tjera çnjerëzore, torturës, vrasjes së paligjshme, zhdukjes me forcë të personave dhe përndjekjes. Krimet që paraqiten në aktakuzë u kryen në disa vende në Kosovë si edhe në Kukës dhe Cahan në Shqipërinë Veriore dhe u kryen nga anëtarë të Ushtrisë Çlirimtare të Kosovës (“UÇK”) kundër qindra civilëve dhe personave që nuk merrnin pjesë aktive në luftime. Ndër viktimat përfshihen persona që dyshoheshin si kundërshtarë të UÇK-së dhe më vonë të Qeverisë së Përkohshme të Kosovës, konkretisht: (i) serbë, romë dhe ashkalinj; (ii) katolikë; (iii) civilë për të cilët pretendohej se bashkëpunonin me autoritetet serbe ose që pretendohej se kontaktonin me serbë; (iv) shqiptarë që ishin anëtarë ose përkrahës të Lidhjes Demokratike të Kosovës ose të partive të tjera që konsideroheshin se ishin kundër UÇK-së; (v) shqiptarë që nuk iu bashkuan ose nuk përkrahnin UÇK-në; dhe (vi) individë të punësuar ose të punësuar të mëparshëm që konsideroheshin kundër UÇK-së..
       Hashim Thaçi, Kadri Veseli, Rexhep Selimi dhe Jakup Krasniqi mbajnë përgjegjësi penale si individë në bazë të formave të ndryshme të përgjegjësisë penale për krimet e paraqitura në aktakuzë, që u kryen në kontekstin e një konflikti të armatosur jondërkombëtar në Kosovë dhe në kuadrin e një sulmi gjerësisht të përhapur dhe sistematik kundër personave të dyshuar si kundërshtarë të UÇK-së. Në kohën e duhur do të jepet informacion për datën dhe orarin e paraqitjeve të para të Hashim Thaçit, Kadri Veselit, Rexhep Selimit dhe Jakup Krasniqit, para gjykatësit të procedurës paraprake. Paraqitjet e para mbahen në seancë publike dhe mund të përcillen përmes transmetimit në Internet në faqen e Dhomave të Specializuara të Kosovës.

    • 17:38

      Vjosa Osmani i drejtohet popullit si Presidente: Serbia kreu krime në Kosovë, të mos barazohet viktima me agresorin

      Vjosa Osmani i është drejtuar popullit të Kosovës, nga pozita e presidentes së përkohshme të vendit. Në një fjalë të shkurtër nga zyra e saj e re,  Osmani ka pranuar se vendi është duke kaluar një situatë të vështirë por të gjithë duhet të qëndrojnë të bashkuar. Ajo u shpreh se ishte Serbia, vendi që ka kryer krime lufte në Kosovë duke shtuar se viktima nuk duhet që të barazohet me agresorin.

      FJALA E OSMANIT SI PRESIDENTE:

      Vendi ynë po kalon ditë të vështira. Qytetarët e Kosovës duhet të dëshmojnë unitet dhe besnikëri ndaj projektit tonë të përbashkët. Republikës sonë. Vendi ynë ka kaluar sfida, përfshirë edhe luftën e fundit. Ndaj duhet që të ushtrojmë më maturi përgjegjësitë dhe ta forcojmë shtetin tonë. Sepse shteti bëhet i fortë edhe kur përballet me sfida. Duke i tejkaluar dinjitetshëm. Proceset që vijnë pas nuk do të dëmtojnë projektin kombëtar për liri. Unë dua të shpreh vlerësimin tim për të gjithë ata që kanë treguar vendosmëri dhe i janë përgjigjur ftesës së dhomave të palëkundura. Beteja për shtetrrethim është më e vështira politike. Kjo kohë kërkon përgjigje të unifikuar shtetërore. Kemi nevojë për solidaritet dhe mirëkuptim të plotë. Do të përkushtohem si presidente që Kosova të bëhet shtet. Të krijohen mundësitë e barabarta për të gjithë. Prandaj dua t’ju lus të qëndrojmë afër njëri-tjetrit për të dëshmuar që i ndajmë këto vlera me njëri-tjetrin. Angazhimi me shtet ligjor na ka përballur me sfida por nuk kemi hequr dorë. E kemi ruajtur këtë shpresë edhe kur kemi qënë viktimë e një agresoni të rënë. Serbia ka vrarë mbi 13 mijë njerëz në Kosovë. Viktima dhe agresori të mos barazohen. Ne kemi qënë viktimë e një genocidi. Serbia kreu krimet duhet ta themi me zë të lartë, këtu dhe gjithmonë. Do ta ruaj stabilitetin si presidente. Zoti e bekoftë Kosovën dhe miqtë e saj.

    • 17:34

      “Haga” i mori bashkëshortin/ Gruaja e Thaçit largohet nga Prishtinë, shkon tek prindërit e ish-presidentit

      Lumnije Thaçi

      Bashkëshortja e ish-presidentit të Kosovës, Hashim Thaçit, Lumnija ka vendosur të largohet nga banesa në të cilën jetonte me ish-kreun e shtetit. Mësohet se ajo ka vendosur që të largohet nga kryeqyteti i Prishtinë, është nisur drejt fshatit Burojë të komunës së Skënderajt. Ish-zonja e parë e vendit duket se ka vendosur që të jetojë me prindërit e Thaçit deri në përfundim të procesit gjyqësor.

    • 15:34

      Ali Ahmeti reagon për akuzat ndaj krerëve të Kosovës: Ishte luftë për liri, do të kthehen fitimtarë

      Kreu i partisë Bashkimi Demokratik për Integrim, Ali Ahmeti ka reaguar pas akuzave të ngritura ndaj Hashim Thaçit, Kadri Veselit, Jakup Krasniqit dhe Rexhepit Selimi nga Prokuroria Speciale e Hagës.

      Përmes një postimi në Facebook, Ahmeti ka shkruar se Lufta e Ushtrisë Çlirimtare të Kosovës ishte luftë e drejtë e kombit shqiptar për liri dhe vetëvendosje, por edhe për drejtësi dhe sundim të së drejtës. Ndërkohë që ka theksuar se është i bindur se bashkëluftëtarët e tij, do ta dëshmojnë luftën e drejtë të Ushtrisë Çlirimtare të Kosovës dhe do të kthehen fitimitarë.

      “Lufta e Ushtrisë Çlirimtare të Kosovës ishte luftë e drejtë e kombit shqiptar për liri dhe vetëvendosje, por edhe për drejtësi dhe sundim të së drejtës, shoqëri demokratike dhe kohezive, të orientuar drejt vlerave euro-amerikane. Jam i bindur që shokët e mi, bashkëluftëtarët e mi, do ta dëshmojnë luftën e drejtë të Ushtrisë Çlirimtare të Kosovës dhe do të kthehen ngadhnjimtarë duke respektuar plotësisht sundimin e ligjit dhe drejtësinë vendore e ndërkombëtare,“– ka shkruar ai.

      Postimi i plotë i Ahmetit:

      Lufta e Ushtrisë Çlirimtare të Kosovës ishte luftë e drejtë e kombit shqiptar për liri dhe vetëvendosje, por edhe për drejtësi dhe sundim të së drejtës, shoqëri demokratike dhe kohezive, të orientuar drejt vlerave euro-amerikane. Jam i bindur që shokët e mi, bashkëluftëtarët e mi, do ta dëshmojnë luftën e drejtë të Ushtrisë Çlirimtare të Kosovës dhe do të kthehen ngadhnjimtarë duke respektuar plotësisht sundimin e ligjit dhe drejtësinë vendore e ndërkombëtare. Unë e di se si unë, ashtu edhe shokët e mi, po ta kishim edhe një jetë, edhe një mundësi, edhe një kushtrim për të luftuar për liri dhe barazi, ne do ta bënim përsëri sepse besuam dhe besojmë në të drejtën e kombit tonë. Të gjitha të arriturat tona në këto dekada i kemi realizuar bashkarisht me miqtë tanë ndërkombëtar dhe bashkarisht, duke respektuar vlerat e përqafuara nga të gjithë ne, edhe do ta përfundojmë rrugëtimin tonë drejt lirisë, pavarësisë, drejtësisë dhe integrimit. Sundimi i ligjit dhe drejtësia e mirëfilltë joselektive janë synime të të gjithë neve andaj dhe përgëzoj krerët e Kosovës që iu përgjigjën thirrjes së drejtësise në mënyrën më dinjitoze dhe ju uroj kthim sa më të shpejtë në detyrat e tyre që i presin,“-ka thënë Ali Ahmedi.

      Ndërkohë edhe vetë Ali Ahmeti është thirrur në Hagës më 2 shtator, ku dhe është intervistuar për 2 ditë. Në një deklaratë për media Ahmeti është shprehur se nuk e ka të lejuar të jap detaje rreth procesit. Po ashtu ai ka thënë se pasi të marrë fund procesi i intervistimit do të flas se çfarë ka ndodhur.

    • 15:53

      Vetëvendosja thyen heshtjen: Dorëheqja e Thaçit e vonuar, shpresojmë të kthehet i pafajshëm

      Lëvizja Vetëvendosje, e cila udhëhiqet nga Albin Kurti ka reaguar pas ngritjes së akuzave nga Gjykata e Hagës, ndaj ish-presidentit Hashim Thaçi dhe ish-kreut të PDK-së, Kadri Veseli. Me anë të një postimi në Facebook, Lëvizja Vetëvendosje shkruan se aktakuzat ndaj tyre lidhen me luftën e UÇK-së, e cila për LVV-në do të mbetet gjithmonë forcë e drejtë, e pastër dhe çlirimtare, duke shtuar se të akuzuarit i presin që të kthehen të pafajshëm. Ndërsa lidhur me ish-kreun e shtetit Hashim Thaçit, i cili sot ka dhënë dorëheqje si president i Kosovës, shkruhet se duhet ta kishte bërë më parë aktin e largimit nga detyra.

      “E vlerësojmë gjestin e dorëheqjes prej presidencës të Hashim Thaçit si të duhur, por të vonuar. Do të ishte mirë të vepronte qysh kur erdhi lajmi për akuzat, e jo të linte vend për të menduar se në prapaskenë po negocion për të shpëtuar veten prej atyre akuzave. Dhjetë vitet e fundit janë dëshmi se si kushdo që ka pretenduar ta mbrojë UÇK-në përmes pazareve të fshehta, ka dështuar, dhe vetëm sa e ka rritur dëmin. Vetë Gjykata Speciale është padrejtësi e prodhuar prej tyre, përderisa ne si Lëvizje, bashkë me shumë veteranë e qytetarë, protestuam kundër saj,“-thuhet në dekalratën e tyre.

      Postimi i plotë:

      Fatkeqësisht Kosova sot nuk është në gjendje ta mbrojë UÇK-në me institucionet e saj, për shkak se keqqeverisja në dekadat e pasluftës ka rezultuar në institucione të brishta të drejtësisë, të cilat nuk kanë fituar besimin e qytetarëve, e njëkohësisht i ka përkeqësuar marrëdhëniet e Kosovës me partnerët ndërkombëtarë. E vlerësojmë gjestin e dorëheqjes prej presidencës të Hashim Thaçit si të duhur, por të vonuar. Do të ishte mirë të vepronte qysh kur erdhi lajmi për akuzat, e jo të linte vend për të menduar se në prapaskenë po negocion për të shpëtuar veten prej atyre akuzave. Dhjetë vitet e fundit janë dëshmi se si kushdo që ka pretenduar ta mbrojë UÇK-në përmes pazareve të fshehta, ka dështuar, dhe vetëm sa e ka rritur dëmin. Vetë Gjykata Speciale është padrejtësi e prodhuar prej tyre, përderisa ne si Lëvizje, bashkë me shumë veteranë e qytetarë, protestuam kundër saj”, thonë në LVV. Tash Kosovës i duhen zgjedhje të reja e të lira, prej të cilave do të dalë një qeveri e cila gëzon mbështetje dhe legjitimitet prej shumicës së qytetarëve, qeveri që ia kthen besueshmërinë vendore e ndërkombëtare Kosovës. Presidenti i ri nuk mund të dalë prej pazareve në Kuvendin e vjetër e të deformuar, por do të dalë me integritet e besueshmëri, nga Kuvendi i ri, pas zgjedhjeve të reja. E deri atëherë, në një tranzicion të shkurtër e transparent drejt zgjedhjeve të reja, znj. Vjosa Osmani si ud. e presidentes, do të kontribuojë për mirë në imazhin ndërkombëtar të Kosovës. Vetëm një qeveri e pakorruptuar, e zgjedhur demokratikisht e jo produkt i pazareve, do të mund ta përparojë Kosovën e ta mbrojë UÇK-në dhe ta vlerësojë ashtu siç e meriton. Të gjithë duhet të bëhemi bashkë në respektim të ligjit, vullnetit të qytetarëve e demokracisë, e jo për t’iu mbivendosur asaj,”-ka thënë LVV-ja.

    • 14:06

      Dorëheqja e Thaçit, Basha mbron ish-presidentin e Kosovës: Askush nuk mund të barazojë viktimën me agresorin

      UÇK

      Kryetari i Partisë Demokratike, Lulzim Basha ka reaguar në lidhje me dorëheqjen e presidentit Hashim Thaçi pas aktakuzës nga Dhomat e Sepcializuara. Në një postim që ka bërë në rrjetet socale, Basha thotë se askush nuk mund të barazojë luftën e drejtë të UÇK-së për dinjitet njerëzor dhe liri, me masakrat dhe genocidin e ushtruar nga hordhitë kriminale të Millosheviçit ndaj popullsisë civile të Kosovës. Ndër të tjeraKryetari i opozitës u shpreh i bindur se ish-luftëtarët dhe drejtuesit e UÇK do të arrijnë t’i faktojnë drejtësisë dhe mbarë botës se aktakuzat ndaj tyre janë të pabaza.

      Postimi i Lulzim Bashës

      Lufta e Ushtrisë Çlirimtare të Kosovës ishte një luftë e drejtë përballë agresionit dhe krimeve kundër njerëzimit e spastrimit etnik që regjimi kriminal i Millosheviçit po kryente ndaj popullsisë së pambrojtur në Kosovë. Anëtarët e UÇK-së, pjesëmarrës në këtë luftë të pabarabartë, janë përballur e kanë dalë faqebardhë ndaj akuzave të ndryshme që janë ngritur ndaj tyre. Të tjerë luftëtarë po përballen sot. Jam i bindur se edhe ata, që nga presidenti Hashim Thaçi, kryetari i PDK Kadri Veseli, ish kryetari i Kuvendit Jakup Krasniqi e luftëtarë të tjerë të UÇK-së, do t’i faktojnë drejtësisë dhe mbarë botës se aktakuzat ndaj tyre janë të pabaza. Askush nuk mund të barazojë viktimën me agresorin. Askush nuk mund të barazojë luftën e drejtë të UÇK-së për dinjitet njerëzor dhe liri, me masakrat dhe genocidin e ushtruar nga hordhitë kriminale të Millosheviçit ndaj popullsisë civile të Kosovës. Lufta e UÇK-së pati në krah të saj Aleancën e Atlantikut të Veriut me në krye SHBA, sepse ishte një luftë e drejtë. Shqiptarët patën në krah dhe mbrojtje të tyre të gjitha vendet demokratike të botës sepse ndaj tyre po kryeheshin krimet më çnjerëzore. Asnjë shqiptar i Kosovës nuk i është fshehur drejtësisë por është përballur dhe ka ngadhnjyer. Jam i bindur se edhe këtë herë e vërteta do të ngadhnjejë dhe se asgjë nuk do mund të përbaltë luftën e drejtë të UÇK për liri.

    • 13:43

      Thaçi jep dorëheqjen nga posti i Presidentit të Kosovës/ Hoti: Kushtetuta garanton tranzicionin, qeveria e Kosovës do të kryejë obligimet dhe përgjegjësitë e saj

      Hashim Thaçi dhe Avdullah Hoti

      Kryeministri i Kosovës, Avdullah Hoti ka reaguar pas dorëheqjes së presidentit të vendit Hashim Thaçi nga posti i Presidentit. Hoti në rrjetin social Facebook ka publikuar deklaratën e Qeverisë ku thuhet se kushtetuta dhe ligjet në fuqi garantojnë tranzicion të qartë të ushtrimit të përgjegjësive pa krijuar vakum institucional.

      Postimi i Kryeministrit të Kosovës:

      Deklaratë e Qeverisë së Republikës së Kosovës. Qeveria e Republikës së Kosovës vlerëson se në situatën e re të krijuar pas dorëheqjes së Presidentit të Republikës, z. Hashim Thaçi, kushtetuta dhe ligjet në fuqi garantojnë tranzicion të qartë të ushtrimit të përgjegjësive pa krijuar vakum institucional. Gjatë kësaj faze, Qeveria e Republikës së Kosovës me përkushtim do t’i kryej obligimet dhe përgjegjësitë kushtetuese dhe do të bashkëpunojë me të gjithë akterët vendorë dhe ndërkombëtarë. Qeveria e Republikës së Kosovës pret nga të gjithë të vazhdojnë të demonstrojnë kulturë të lartë politike.

    • 13:29

      Thaçi jep dorëheqjen/ Media serbe: Gjarpëri nuk do të jetë më president i një shteti fals

      Media serbe ‘Novosti’ ka reaguar, pas dorëheqjes së Presidentit të Kosovës Hashim Thaçit, pas konirmimit të aktakuzës nga Dhomat e Specialiazuara. Në artikullin, i cili mban titullin “Gjarpëri nuk do të jetë më president i një shteti fals”, media serbe shkruan dhe për dorëheqjen e Thaçit nga posti. Media serbe i është referuar Thaçit me nofkën e tij gjatë luftës së Kosovës, ku ishte drejtues politik i UÇK-së,

      Artikulli i Plotë: 

      GJYKATA në Hagë ka konfirmuar padinë për krime lufte kundër presidentit të institucioneve të përkohshme në Prishtinë, Hashim Thaçi, i cili dha dorëheqjen nga posti. Hashim Thaçi njoftoi në një konferencë për shtyp në Prishtinë se Gjykata e Krimeve të UÇK-së në Hagë ka konfirmuar aktakuzën kundër tij dhe se ai po jep dorëheqjen nga posti i presidentit të institucioneve të përkohshme të Prishtinës.  Në mënyrë që të mbroj integritetin e (të ashtuquajturës) Kosovës, duke respektuar partneritetin me bashkësinë ndërkombëtare, unë po jap dorëheqjen nga pozita e presidentit sot. Ndihem shumë krenar për këtë përgjegjësi që mbaja. Në këto rrethana të reja, unë u bëj thirrje forcave politike që të bëjnë kujdes që të mos zhyten në një krizë të kushtueshme ose institucionale, vendi nuk ka kohë për të humbur, për të ruajtur qetësinë – deklaroi Thaçi.

    • 13:03

      Hashim Thaçi jep dorëheqjen/Ish-kreu i LPK-së: Urime Kosovë për çlirimin nga gjarpri

      Ibrahim Kelmendi dhe Hashim Thaçi

      Ish-kreu i Lëvizjës Popullore të Kosovës Ibrahim Kelmendi ka reaguar pas dorëheqjes së Presdientit të Kosovës nga posti, pas konfirmimit të aktakuzës nga Dhomat e Specializuara. Kelmendi  e ka pritur me gëzim largimin e Thaçit nga detyra. Në një postim në rrjetet sociale ai shkruan: “Urime Kosovë për çlirimin nga gjarpri”.

    • 13:21

      Dha dorëheqjen pas akt-akuzave, Rama: Hashim Thaçi ka gjjithë mbështetjen e Shqipërisë në këtë betejë, proces absurd!

      Kryeministri i Shqipërisë Edi Rama ka mbështetur Hashim Thaçin në rrugën e tij për tu përballur me akt-akuzat e ngritura nga Dhoma e Specializuar në Hagë. Përmes një statusi në rrjetet sociale, Rama shkruan se Thaçi ka gjithë mbështetjen e Shqipërisë në këtë betejë. Këtë proces, kryeministri e cilëson absurd, teksa shton se do të vulosë përfundimisht pastërtinë e UÇK-së dhe pamundësinë për ta rishkruar historinë e saj. “Hashim Thaçi ka gjjithë mbështetjen e solidaritetin e Shqipërisë në këtë betejë të radhës për Kosovën dhe për drejtësinë e pacënueshme të Luftës Çlirimtare! Procesi absurd ndaj tij do të vulosë përfundimisht pastërtinë e UÇK-së dhe pamundësinë për ta rishkruar historinë e saj,“- shkruan Rama.

    • 12:55

      Djali i Hashim Thaçit prek me fjalët pas nisjes së të atit në Hagë: Babë, e ke fituar lirinë, tash po udhëheq betejën për drejtësi

      Endrit Thaçi, djali i ish-Presidentit të Kosovës Hashim Thaçi, ka mbështetur babain e tij pasi ky i fundit dha dorëheqjen teksa lajmëroi përballjen me Dhomën Speciale në Hagë. Përmes një statusi në rrjetet sociale, Thaçi shkruan se babai i tij e ka fituar lirinë dhe tashmë do të udhëheqë betejën për drejtësi. Ai lajmëron kthimin e Thaçit në shtëpi, shumë shpejt.

      “Baba im e ka fitu betejën e lirisë. Dhe të lirë jemi. Ai e udhëhoqi edhe betejën për republike. Dhe shtet u bëmë e do të mbesim. Tash do ta udhëheq betejën për drejtësi. Sepse babai , bashkëluftëtarët e tij dhe krejt lufta ishte e drejtë. Do të më merr malli shumë por do të festoj çdo ditë me buzëqeshje dhe kokën lartë fitoret e tuja me mamin, familjën tonë, shokët. Do të pres me pa durim edhe pse shpejtë do të kthehesh në shtëpi. UÇK,”- shkruan ai krah një fotoje ku shfaqet bashkë me të atin, duke qeshur.


      Ndërsa në Instastory, ka publikuar dy foto të tjera, teksa shfaqet krenar për UÇK-në dhe mbështet Kadri Veselin gjithashtu. “Liria ka emër,”- shton ai.

    • 12:40

      Dorëheqja e Hashim Thaçit, Ilir Meta: Ky është një moment reflektimi për të forcuar më shumë bashkëpunimin dhe unitetin

      Presidenti shqiptar, Ilir Meta është shprehur se lufta e Ushtrisë Çlirimtarë të Kosovës, ka qenë e heroike. Në një postim në Facebook ai është shprehur se e vlerëson dorëheqjen e Hashim Thaçit nga posti i Presidentit të Kosovës. Meta gjithashtu u shpreh se tani është momenti më i mirë për të forcuar sa më shumë bashkëpunimin mes dy vendeve.

      Postimi i plotë:

      Lufta e Ushtrisë Çlirimtare të Kosovës ka qenë e drejtë dhe heroike.
      Vlerësoj aktin e dorëheqjes së Presidentit të Republikës së Kosovës, Hashim Thaçi, për t’u ballafaquar me akuzat dhe besoj në pafajësinë e Tij e të gjithë bashkëluftëtarëve, sikundër është konfirmuar edhe në të kaluarën. Ky është një moment reflektimi për të forcuar më shumë bashkëpunimin dhe unitetin, në interesin më të mirë kombëtar.

    • 12:03

      Deputetja e Kosovës flet në lidhje me akt-akuzat për Hashim Thaçin dhe Kadri Veselin, Mimoza Kusari: Ndjenja e padrejtësisë po ndjehet tek të gjithë qytetarët e Kosovës

      Mimoza Kusari-Lila

      Deputetja e Kuvendit të Kosovës, Mimoza Kusari-Lila është shprehur se struktura institucionale e Kosovës është tronditur për shkak të konfirmimit të akt-akuzave të ish-presidentit Hashim Thaçi dhe kryetarit të PDk-së, Kadri Veseli. Ajo gjithashtu ka thënë se Kosova në atë luftë është vetëm viktima e sulmuar nga Serbia. “Zhvillime dramatike, shkundet në substancë e gjitha struktura institucionale e Kosovës. Ndjenja e padrejtësisë po ndjehet tek të gjithë qytetarët e Kosovës. Sepse në luftën e fundit Kosova është sulmuar nga Serbia. Shqiptarët tash dorëzojnë një nga një krerët institucionalë për tu përballur me drejtësinë,” është shprehur ajo.

    • 12:32

      Godina e Presidencës e rrethuar nga Policia! Thaçi, Veseli dhe Selimi mbërrijnë në zyrat e EULEX, zbarkon “Audi” i zi

      Hashim Thaçi, Rexhep Selimi dhe Kadri Veseli kanë mbërritur në Fushë Kosovë, ku ndodhen dhe zyrat e EULEX, në Prishtinë. Menjëherë pasi Thaçi tha dorëheqjen dhe Selimi e Veseli hoqën dorë nga të gjitha postet publike, kanë mbërritur në zyrat e EULEX. Në foton e mëposhtme, dallohet edhe makina e llojit “Audi”, që mendohet të jetë i Thaçit.

      Makina pranë zyrave të Eulex

      Ndërkohë, fotot e tjera, vijnë nga godina e Presidencës, e cila është rrethuar nga forca të shumta policie.

    • 12:14

      Thaçi në Hagë/ Vjosa Osmani emërohet përkohësisht Presidente e Kosovës, postin ia jep Kushtetuta!

      Vjosa Osmani

      Vjosa Osmani emërohet presidente e Kosovës, pas dorëheqjes së Presidentit të Kosovës Hashim Thaçi. Mediat në vend shkruajnë se  Osmani, e cila ishte kryeparlamentare e Kuvendit të Kosovës, tashmë do të jetë presidente e vendit përkohësisht. Kushtetuta e Kosovës parashikon që në rast dorëheqjeje të presidentit dhe në rast vakance, atëherë është kryetari i Kuvendit, ai që merr detyrën. “Në rast se Presidenti i Republikës së Kosovës përkohësisht nuk është i aftë për të përmbushur përgjegjësitë e tij/saj, ajo/ai mund t’ia kalojë vullnetarisht detyrat e postit të tij/saj, Kryetarit të Kuvendit, i cili do të jetë ushtrues i detyrës së Presidentit të Republikës së Kosovës. Urdhri i Presidentit për kalimin e përgjegjësive duhet të përmbajë veçanërisht arsyet dhe kohëzgjatjen e kalimit të përgjegjësive, nëse ka njohuri për to. Presidenti i Republikës së Kosovës do të rifillojë ushtrimin e përgjegjësive kur të jetë në gjendje t’i ushtrojë përgjegjësitë, dhe kështu Kryetarit të Kuvendit i pushon posti i ushtruesit të detyrës së Presidentit”, thotë Neni 90 [Mungesa e Përkohshme e Presidentit], e Kapitullit V të Kushtetutës së Kosovës.

    • 12:13

      Akt-akuzat e Speciales, Qeveria e Kosovës: Askush nuk mund ta gjykojë luftën tonë për liri. Mbrojtëm pragun e shtëpisë

      Qeveria e Kosovës, ka reaguar pas ngritjes së akt-akuzave për krimet lufte ndaj politikanëve të vendit, nga Dhoma e Specializuar në Hagë. Përmes një deklarate zyrtare, Qeveria e Kosovës pretnedon se askush nuk mund ta gjykojë luftën e Kosovës për liri. Sipas Qeverisë së Kosovës, Ushtria Çlirimtare e Kosovës luftoi për çlirimin e vendit, për mbrojtjen e pragut të shtëpisë, e jo në tokë të huaj, dhe si e tillë gëzoi mbështetjen e bashkësisë ndërkombëtare, që kulmoi me fushatën e bombardimeve të NATO-s.

      Reagimi i plotë i Qeverisë së Kosovës:

      Qeveria e Republikës së Kosovës po i përcjell me vëmendje zhvillimet e fundit rreth Dhomave të Specializuara, të cilat janë pjesë e sistemit të drejtësisë të Republikës së Kosovës. Qeveria e Republikës së Kosovës beson thellë në luftën e drejtë të Ushtrisë Çlirimtare të Kosovës për lirinë e vendit, që mbetet një nga periudhat më të ndritshme të historisë. Askush nuk mund të gjykojë luftën tonë për liri. Ushtria Çlirimtare e Kosovës luftoi për çlirimin e vendit tonë, për mbrojtjen e pragut të shtëpisë, e jo në tokë të huaj, dhe si e tillë gëzoi mbështetjen e bashkësisë ndërkombëtare, që kulmoi me fushatën e bombardimeve të NATO-s. Qeveria e Republikës së Kosovës, konsideron se askush nuk mund të konsiderohet fajtor pa vendim përfundimtar të organeve kompetente të drejtësisë. Bartësit e institucioneve si dhe qytetarët e Kosovës kanë qenë gjithmonë dhe vazhdojnë të jenë shembull për respektim dhe bashkëpunim me drejtësinë vendore dhe ndërkombëtare.

    • 12:00

      Thaçi jep dorëheqjen/ Haradinaj: Të tregojmë unitetin kombëtar, presidenti të ketë mbështetjen e Qeverisë 

      Ramush Haradinaj dhe Hashim Thaçi

      Kryetari i Aleancës së Ardhmërisë së Kosovës, Ramush Haradinaj ka reaguar pas dorëheqjes së Hashim Thaçit nga posti i Presidentit, pasi iu konfirmua aktakuza për krime lufte nga Dhomat e Specializuar. Në një postim në rrjetet sociale ka folur në lidhje me aktakuzat që iu konfirmuan edhe ish-kryetarin e Partisë Demokratike të Kosovës, Kadri Veseli.  Haradinaj ka kërkuar përkrahjen e qeverisë së Kosovës dhe qytetarëve të vendit përgjatë përballjeve të këtyre dy aktorëve politik me drejtësinë ndërkombëtare. “Të nderuar qytetarë të Kosovës,Ushtria Çlirimtare e Kosovës, ishte faktor uniteti në vitet e krenarisë dhe sakrificës. Sot, të gjithë ne si popull, por edhe si liderë politik, duhet të tregojmë unitetin kombëtar, në rrethanat e reja të krijuara. Presidenti Thaçi, kryetari Veseli dhe të gjithë bashkëluftëtarët e mi, që po përballen me gjyqësinë ndërkombëtare, duhet të kenë përkrahjen tonë dhe të qeverisë së Kosovës, pa asnjë rezervë. Duke besuar fuqishëm se do të vërtetohet pafajësia e tyre, Republika e Kosovës do të tejkalojë faqebardhë edhe këtë sfidë.”– shkruan ai.

    • 11:46

      Hashim Thaçi jep dorëheqjen si president i Republikës së Kosovës: Në Hagë do të shkoj si qytetar i thjeshtë, s’dua protesta dhe maniftestime! Vij faqebardhë

      Në një konferencë për shtyp Thaçi është shprehur se në gjyq nuk do të shkojë si president i Kosovës por si qytetar i thjesht. Sakaq, Thaçi ka shtuar se është krenar se ka qenë pjesë UÇK-së duke thënë se nuk po jep lamtumirën dhe se nga Haga do të kthehet faqe bardhë.

      JALIMI I PLOTË I HASHIM THACIT:

      Çmimi i vogël i radhës që kërkohet të paguhet për lirinë e vendit tonë.  Unë jam me fat që jam gjallë e kam parë me sytë e mi ëndrrën tonë shekullore të bëhet realitet. Jam krenar që kam qenë pjesë e UCK. Krenar që bashkë me aletatët tanë kemi luftuar regjimin e Miloshevicit, e kemi fituar lirinë. Fitorja jonë ka nënkuptuar edhe përgjegjësi. Kemi qenë të përkushtuar për shtet. Jemi populli liridashës, por jo hakmarrës, asnjë pretendim nuk do shkruajë historinë. Kosova ka qenë viktima Serbia agresori.Ju lus për maturi qetësi, unitet e bashkim. Të qëndrojmë të bashkuar garanton suksesin tonë. Suksesi ynë është Kosova e lirë. Jemi shtet demokratik e shoqëri ku sundon ligji e demokracia. Duhet të ruajmë besimin në dialog të brendshëm, fqinjësor e paqe në rajon. Nuk do lejoj në asnjë rrethanë që para gjyqit të dalë presidenti i Kosovës. Ndaj për të mbrojtur integritetin e Kosovës unë sot jap dorëheqjen nga posti i Presidentit të Republikës. Për përpjekjet tona për liri pavarësi dhe shtetndërtim. Do të bashkëpunoj ngushtë me drejtësinë dhe jam në dispozicion të drejtësisë. Besoj në të vërtetën dhe të ardhmen e shoqërisë tonë. Sot më shumë se kurrë ju lus dhe ju bëj thirrje të mos e humbisni shpresën dhe durimin. Sot më shumë se kurrë ju ftoj të reflektoni se sa shumë kemi fituar si komb në këto tri dekada. Kemi fituar lirinë dhe pavarësinë. Aktakuza kundër meje, është çmim i vogël i radhës që kërkohet ta paguajmë për lirinë e vendit tonë. Shumë lehtë kam mundur të mos jem fare në këtë botë sikur shumë bashkëkombës tanë. Jam krenarë së bashku me bashkësinë ndërkombëtare me aleatët tanë, që kemi luftuar regjimin gjenociadial të Millosheviçit që kemi fituar lirën. Kosova ka qenë viktima dhe Serbia agresori. Kjo është mundësi e re dhe duhet ta shfrytëzojmë si avantazh, dhe kjo mund të arrihet duke bashkëpunuar me bashkësinë ndërkombëtare. Ju lus për maturi, qetësi dhe unitet e bashkim , të qëndrojmë të bashkuar. Kosova është histori e suksesit, e suksesit qytetarë. Nuk do të lejoj që para Gjykatës Speciale të dal presidenti i Kosovës. Unë sot jap dorëheqje nga presidenti.

    • 11:18

      Pas akt-akuzave të Speciales, Thaçi konferencë për mediat

      Pas konfirmimit të akt-akuzës për kryetarin e Partisë Demokratike të Kosovës, Kadri Veselin, pritet që Presidenti i Kosovës, Hashim Thaçi të mbajë një konferencë për mediat. Lajmi është bërë i ditur nga presidenca ku thuhet se konferenca do të fillojë në orën 11:30.

      “Presidenti Thaçi mban konferencë për media në orën 11:30 Presidenti i vendit, Hashim Thaçi, sot në orën 11:30, do të mbajë konferencë për media. Vendi: Hapësira në hyrje të Presidencës”, thuhet në njoftim.

      Hashim Thaçi
    • 10:09

      Konfirmohet aktakuza për krime lufte ndaj Kadri Veselit/ Kreu i PDK-së: Do të tërhiqem nga të gjitha detyrat politike, në Hagë do të shkojë si qytetar i thjeshtë

       

      Kadri Veseli

      Gjykata Speciale ka konfirmuar akt-akuzën për kirme lufte ndaj krut të Partisë Demokratike në Kosovë Kadri Veseli. Lajmin e ka bërë vetë të ditur ai, ku nëpërmjet një postimi që ka bërë në rrjetet sociale thotë se është vënë mbrëmë në dijeni për padinë nga Zyra e Prokurorit të Dhomave të Specializuara. Veseli shprehet se do të shkojë vetë në Hagë për t’iu përgjigjur akuzave, por megjithatë nuk ka dhënë të tjera detaje rreth akuzave. Gjithashtu, ai shkruan se tërhiqet nga të gjitha detyrat politike dhe publike duke shkuar në Hagë si qytetar i thjesht.

      DEKLARATA E PLOTE E KADRI VESELIT: 

      Dje pasdite, jam informuar nga Zyra e Prokurorit të Dhomave të Specializuara se gjyqtari i procedurës paraprake ka konfirmuar aktakuzën kundër meje. Përmes kësaj deklarate, dua ti informoj qytetrët e Kosovës se kam bërë aranzhimet e nevojshme për të udhëtuar vullnetarisht drejt Hagës në mënyrë që t’iu përgjigjem këtyre akuzave. Nuk do të komentoj më shumë kësaj radhe.

      “Drejtësi për babin”, në përvjetorin e katërt vajza e Astrit Deharit shkon te varri i ish-aktivistit të Vetëvendosjes

      Jam i vetëdijshëm se ka njerëz në Kosovë që mendojnë se Dhomat e Specilizuara janë një fyerje e luftës sonë historike për të mbrojtur popullin e Kosovës nga krimet e regjimit të Millosheviqit. Por unë nuk e shoh në këtë mënyrë, UNë e shoh si një mundësi që më në fund të përgjigjem ndaj këtyre dyshimeve dhe thashtethemeve të rrejshme të cilat kanë qarkulluar për vite të tëra. Që kur Dick Marty publikoi raportin e tij të pabazuar, ishte e pashmangshme që kjo ditë do të vinte. Ishte e pashmangshme që akuzat e tij të padrejta do të duhej të testoheshin në një gjykatë, në mënyrë që tu jepej fund njëherë e mirë. Kjo është arsyeja që unë e kam përkrhaur themelimin e këtij tribunali, dhe kjo është arsyeja që unë tani jam i gatshëm që të luaj rolin tim në këtë proces.

      Më shumë se njëzet vite kanë përfunduar që nga përfunimi i luftës çlirimtare. Kosova tani është një shtet i pavarur, dhe është në rrugën e sigurt për tu bërë anëtar i Kombeve të Bashkuara. Pasi që aspirojmë që të trajtohemi si partner të barabartë me shtetet e tjera, liderët tanë politikë duhet të jenë në lartësinë e kësaj sfide dhe të sillen si burrështetas të kalibrit ndërkombëtar. Kur liderët e përveçëm thirren për të bashkëpunuar me një tribunal ndërkombëtar, ne duhet të veprojmë kështu pa hezitim. Edhe nëse ka akuza të bëra kundër nesh, atyre ju duhet dhënë përgjigja në mënyrën e duhur, me faktet e së vërtetës.  Unë këtë jam duke e bërë.

      Kadri Veseli
    • 9:33

      Pak para nisjes në Hagë Selimi viziton varrin e Astrit Deharit: Do të flas nga Haga, atje më shkon më mirë zëri

      Shefi i Grupit paralamentar të Lëvizjes Vetëvendosje, Rexhep Selimi së bashku me disa deputetë të tjerë ka bërë sot homazhe para varrit të anëtarit të partisë së tij, Astrit Deharit në 4 vjetorin e vdekjes së tij. Pas homazheve ai ka dhënë një deklaratë të shkurtër për mediat kosovare ai është shprehur se rëndësinë e kësaj ditë nuk do ta mposhte asgjë tjetër. “Jemi te varri i Astritit dhe Arbnorit, nuk ka ngjarje tjetër që do të mund ta mposhte këtë ditë. Mos ma merrni si refuzim po do të flas prej atje, besoj prej atje besoj më shkon zani më mirë. Nuk jam unë ai që e di”, ka thënë ai. Selimi gjithashtu ka thënë se do të flasë më shumë në Gjykatën e Hagës pasi atje do të dëgjohet më mirë.

      “Do të flas prej atje, më shkon zëri më mirë”, ka thënë Selimi.

      Ndërkohë që nisja e tij në Hagë pritet që të ndodhë në orën 09:00.

    • 8:59

      EULEX operacione në Kosovë/ Avokati jep lajmin: Në ditët në vijim pritet dërgimi i Hashim Thaçit dhe Kadri Veselit në Hagë

      Avokati kosovar, Tomë Gashi është shprehur se policia e EULEX-it në ditët në vijim pritet që të dërgojë Presidentin Hashim Thaçi dhe ish-kryetarin e kuvendit të Kosovës, Kadri Veselin të Gjykata e Hagës. Në një intervistë për mediat kosovare ai është shprehur se në ditët në vijin do të jenë edhe shumë arrestime të tjera.

       “Do të kemi edhe arrestime të tjera, nuk do të ndalen vetëm me 5 arrestime. Po ka lajme që ditët në vijim, pritet edhe dërgimi i zotri Thaçi dhe Veseli”, tha Gashi.

      Tomë Gashi

    Shto Koment