Rajoni

Hidhen poshtë propozimet e Hahim Thaçit, Gjykata Speciale vazhdon mandatin

Gjykata Kushtetuese ka hedhur poshtë amandametet e propozuara nga ish-presidenti Hashim Thaçi për zgjatjen e mandatit të ashtuquajturës Gjykatë Speciale. Në njoftim thuhet se Dhomat e Specializuara do ta vazhdojnë mandatin e tyre. 
Featured image of article: Hidhen poshtë propozimet e Hahim Thaçit, Gjykata Speciale vazhdon mandatin Hashim Thaçi

HAGË– Dhoma e Specializuar e Gjykatës Kushtetuese ka hedhur poshtë amandametet e propozuara nga ish-presidenti Hashim Thaçi për zgjatjen e mandatit të ashtuquajturës Gjykatë Speciale. Në njoftim thuhet se Dhomat e Specializuara do ta vazhdojnë mandatin e tyre.

“Dhoma Kushtetuese vendosi se amendamentet kushtetuese të propozuara pakësojnë të drejtat dhe liritë e garantuara prej Kapitullit II të Kushtetutës”, thuhet në njoftimin për aktgjykim nga Dhoma Kushtetuese.

NJOFTIMI:

AKTGJYKIM MBI REFERIMIN E AMENDAMENTEVE TË PROPOZUARA TË KUSHTETUTËS SË KOSOVËS Më 26 Nëntor 2020, Dhoma e Specializuar e Gjykatës Kushtetuese (‘Dhoma Kushtetuese’) nxori aktgjykimin e saj mbi referimin e amendamenteve të propozuara të nenit 162 të Kushtetutës së Kosovës (‘Kushtetuta’), për Dhomat e Specializuara dhe Zyrën e Prokurorit të Specializuar. Dhoma Kushtetuese vendosi se amendamentet kushtetuese të propozuara pakësojnë të drejtat dhe liritë e garantuara prej Kapitullit II të Kushtetutës. Amendamentet kushtetuese u propozuan më 24 gusht 2020 nga Presidenti i atëhershëm i Kosovës dhe në vijim Kryetarja e Kuvendit të Kosovës ia përcolli ato Dhomës për vlerësim paraprak, në përputhje me nenin 144(3) të Kushtetutës. Në aktgjykimin e saj Dhoma Kushtetuese vlerësoi amendamentet kushtetuese të propozuara duke u kushtuar vëmendjen e duhur kontekstit dhe veçorive specifike të Dhomave të Specializuara dhe Zyrës së Prokurorit të Specializuar. Dhoma Kushtetuese gjithashtu konfirmoi se në pajtim me nenin 162(3) të Kushtetutës, kjo Dhomë ka juridiksion ekskluziv për kryerjen e këtij vlerësimi, duke qenë se amendamentet e propozuara kanë lidhje me Dhomat e Specializuara dhe Zyrën e Prokurorit të Specializuar. Po kështu, Dhoma Kushtetuese theksoi se në pajtim me nenin 162(13) dhe (14) të Kushtetutës, mandati i Dhomave të Specializuara dhe i Zyrës së Prokurorit të Specializuara ka vazhduar dhe do të vazhdojë deri sa Këshilli i Bashkimit Evropian të njoftojë për përfundimin e mandatit të tyre.

Për më shumë bëhu pjesë e grupit më viral në Facebook, Dosja.al

Ish-presidenti i Kosovës, Hashim Thaçi  më 25 gusht i ishte drejtuar Kryesisë së Kuvendit të Kosovës me propozim për amendamentin e Kushtetutës për zgjatjen e mandatit të Dhomave të Specializuara dhe Zyrës së Prokurorit të Specializuar në Hagë. Thaçi në propozimin e tij dërguar Kryesisë së Kuvendit, ka kërkuar të ndryshohet neni i amendamentit, ku thuhet se mandati i këtij institucioni do të zgjasë për një periudhë pesëvjeçare.

Aktualisht si të akuzuar në Hagë gjenden, Hashim Thaçi, Kadri Veseli, Jakup Krasniqi, Rexhep Selimi. Të katër zyrtarët më të lartë të Kosovës, akuzohen për arrestim të paligjshëm, vrasje dhe torturë, të cilat konsiderohen si krime lufte. Në aktakuzën e publikuar shkruhet se nga marsi i vitit 1998 deri në shtator të një viti më vonë, në Kukës dhe Cahan janë kryer krime ndaj qindra civilëve që nuk ishin pjesë e luftës së UÇK-së.

(A.k.dosja.al)

Etiketa:

Shto Koment