Politike

Gafat ‘shkarkojnë’ Valbona Sakon, Durrësi në duart e të besuarit të Vangjush Dakos. Rama: Fajin e kanë mediat, terrorizojnë njerëzit

Mëngjesin e sotëm, kryebashkiakja Valbona Sako dha dorëheqjen. Në vend të saj u emërua, ashtu siç e kërkon edhe ligji nënkryetari tjetër Zhuljen Varfaj, “krahu i djathë” i ish-kryebashkiakut Vangjush Dako.
Featured image of article: Gafat ‘shkarkojnë’ Valbona Sakon, Durrësi në duart e të besuarit të Vangjush Dakos. Rama: Fajin e kanë mediat, terrorizojnë njerëzit Zyrtarët e Durrësit dhe Edi Rama

DURRËS- Largime masive nga Durrësi! Pas banorëve, të cilët janë larguar nga frika apo pasi tërmeti i ka prishur banesën, ikje ka pasur edhe nga zyrtarët e lartë të bashkisë.  Mëngjesin e sotëm, kryebashkiakja Valbona Sako dha dorëheqjen, e disa orë pas saj nga posti i nënkryetares u largua edhe Etleva Kondi.

Mesa duket gafat e bëra në prononcimet për gazetarët i kanë kushtuar shtrenjtë Sakos. Vetë ajo shkruante në Facebook, se kishte marrë mjaft komenteve negative. Në vend të saj u emërua, ashtu siç e kërkon edhe ligji nënkryetari tjetër Zhuljen Varfaj, “krahu i djathë” i ish-kryebashkiakut Vangjush Dako. Varfajt i ka kaluar automatikisht detyra pas dorëheqjes së Sakos sipas pikës 5 të nenit 61.

Me përfundimin para kohe të mandatit të kryetarit të bashkisë, sipas këtij neni, deri në zgjedhjen e kryetarit të ri, funksionet e tij i kryen zëvendëskryetari i bashkisë. Në rastet kur ka më shumë se një zëvendëskryetar bashkie, këshilli përkatës, me shumicën e votave të numrit të përgjithshëm të anëtarëve të tij, cakton një nga zëvendëskryetarët të kryejë funksionet e kryetarit deri në zgjedhjen e kryetarit të ri.”

Nga ana tjetër, kryesocialisti Edi Rama, i pyetur drejtpërdrejt nga një gazetare i ka bërë “bisht” pyetjes për Sakon, duke kritikuar mediat. 

51 persona të vdekur, 913 të plagosur dhe 47 të shpëtuar, ky është bilanci i tërmetit. Kërkimet në Thumanë  dhe Durrës janë mbyllur, viktimat janë përcjellë për në banesën e fundit. Toka vijon të dridhet nga pasgoditjet.

(k.m/dosja.al)

  • 16:06

    PD e Durrësit: Qyteti në duart e Dakos, Zhyljen Varfi njeriu i tenderave korruptiv

    Vangjush Dako, Zhyljen Varfi dhe Ferdinant Xhaferri

    Partia Demokratike dega Durrës, ka reaguar aps dorëheqjes së Valbona Sakos nga drejtimi i kësaj bashkie. Në një reagim kreu i PD-së në Durrës, Ferdinant Xhaferri, shkruan se tashmë qyteti është sërish në duart e Vangjush Dakos.

    “Doreheqjet e njepasnjeshme te Sakos,  dhe nen/kryetares Kondi ne te vertete tregojne shkermoqjen e Edi Rames, arkitektit te rrenimit te Durresit”, shkruan Xhaferri.

    REAGIMI I PLOTË

    Durresi i rikthehet Dakos. Me vendimin e sotem te keshillit bashkiak njeriu me i afert i Vangjush Dakos, Zhyljen Varfi apo njeriu i tenderave korruptive qe akoma sjane mbyllur ne prokurori, merr ne dore drejtimin e Bashkise. Doreheqjet e njepasnjeshme te Sakos,  dhe nen/kryetares Kondi ne te vertete tregojne shkermoqjen e Edi Rames, arkitektit te rrenimit te Durresit. Sot kemi anarki totale ne administrimin e qytetit se per vite te tera nuk i eshte sherbyer interesave te qytetareve, por vetem te grupeve kriminale. Kjo eshte arsye qe sot askush nuk eshte ne gjendje te sherbeje dhe jemi ne kushtet e ç’organizimit ku kudo qytetaret, ne te gjitha lagjet e qytetit, na thone se askush nuk i ka kontaktuar.

  • 14:52

    PROFIL/ Kush është Zhulien Varfaj, i besuari i VANGJUSH DAKOS që do të marrë Durrësin

    Zhulien Varfaj dhe Vangjush Dako

    Dita ka nisur me largime nga Bashkia e Durrësit. Pas gafave të bëra më disa prej televizioneve të vendit, kryebashkiakja Valbona Sako ka dhënë dorëheqjen nga posti i saj, duke bërë me faj komentet negative. Pak pas saj, në mbledhjen e Këshillit Bashkiak dorëheqjen e dha edhe nënkryetarja Etleva Kondi, ndërsa në vend të Sakos u emërua Zhulien Varfaj, i cili do të mbajë detyrën deri në zhvillimin e zgjedhjeve të reja. 

    Po kush është Zhulien Varfaj?

    Varfaj është një nga personat më të besuar të Vangjush Dakos, i cili e ka mbajtur pranë përgjatë 12 viteve që ka qeverisur Durrësin. Zhulien Varfaj nuk është një emër i panjohur për durrsakët dhe për mediat gjithashtu. Deri më tani, Zhulien Varfaj ka disa akuza që i rëndojnë mbi supe për të cilat ende nuk është marrë një vendim.

    Në janar të këtij viti emisioni “Stop” trajtoi rastin e tenderit të autobusëve në bashkinë e Durrësit, ku pretendohej se Bashkia kishte skualifikuar pa të drejtë kompaninë “Vata trans”. Anëtar i Komisionit Vlerësues ka qënë edhe Nënkryetari i Bashkisë, Zhulien Varfaj. Në 2013, shoferi i tij, Ëngjëll Taulla merrte nga 500 mijë lekë, duke përdorur emrin e nënkryetarit dhe mashtronte qytetarët se do t’i ndihmonte ata në zgjidhjen e problemit të strehimit. 

  • 14:28

    FOTO-LAJM/ Dako rikthehet ‘në lojë’ pas largimit të Sakos, krahu i djathë merr drejtimin e Durrësit

    Largime masive nga Durrësi! Pas banorëve, të cilët janë larguar nga frika apo pasi tërmeti i ka prishur banesën, ikje ka pasur edhe nga Bashkia e qytetit. Mëngjesin e sotëm, kryebashkiakja Valbona Sako dha dorëheqjen, e disa orë pas saj nga posti u nënkryetares u largua edhe Etleva Kondi. Mesa duket gafat e bëra në prononcimet për gazetarët i kanë kushtuar shtrenjtë Sakos. Vetë ajo shkruante në Facebook, se kishte marrë mjaft komenteve negative. 

    Në vend të saj u emëruar, ashtu siç e kërkon edhe ligji nënkryetari tjetër Zhuljen Varfaj, “krahu i djathë” i ish-kryebashkiakut Vangjush Dako. Kjo ka risjellë në skenë edhe këtë të fundit.  Pas një profili të ulët publik muajt e fundit, Dako është parë pranë Bashkisë së Durrësit. Por jo vetëm!

    Socialistët pranë Bashkisë

    Dako shoqërohej me ministrin e Bujqëisë, Blendi Çuçin, ish-ministrin e Financave Arben Ahmetajn dhe me drejtorin e OSSHE-së, Ardian Çelën. Siç duket edhe nga fotoja e siguruar nga Dosja.al, socialistët diç diskutojnë mes njëri-tjetrit. Çfarë të jetë vallë?

  • 13:47

    Pas Valbona Sakos, dorëhiqet edhe nënkryetarja e saj Etleva Kondi

    Etleva Kondi

    Pas kryebashkiakes Valbona Sako, dorëheqjen nga posti i saj e ka dhënë edhe një nga nënkryetarët e saj. Mësohet se paraditen e sotme ka dhënë dorëheqjen nga postimi i saj Etleva Kondi, e cila u emëruar në këtë post vetëm pak muaj më parë.

  • 13:17

    Valbona Sako dha dorëheqjen, nënkryetari Zhulien Varkaj merr drejtimin e Bashkisë së Durrësit

    Zhuljen Varkaj dhe Valbona Sako

    Disa orë pas dorëheqjes së kryebashkiakes së Durrësit, Valbona Sakos, në qytetin bregdetar është vendosur emri i pasardhësit të saj. Në mbledhjen e Këshilit Bashkiak të qytetit është vendosur që në postin e kryebashkiakut të vendoset Zhulien Varkaj. Varfaj ka qënë një nga personat e bësuar të paraardhësit të Sakos, Vangjush Dakos duke mbajtur edhe postin e nënkryetarit të Bashkisë. Varfajt i ka kaluar automatikisht detyra pas dorëheqjes së Sakos sipas pikës 5 të nenit 61.

    Me përfundimin para kohe të mandatit të kryetarit të bashkisë, sipas këtij neni, deri në zgjedhjen e kryetarit të ri, funksionet e tij i kryen zëvendëskryetari i bashkisë. Në rastet kur ka më shumë se një zëvendëskryetar bashkie, këshilli përkatës, me shumicën e votave të numrit të përgjithshëm të anëtarëve të tij, cakton një nga zëvendëskryetarët të kryejë funksionet e kryetarit deri në zgjedhjen e kryetarit të ri.”

  • 12:07

    Dorëheqja e Sakos, Rama i bën ‘bisht’ pyetjes, ia hedh fajin gazetarëve

    Kryeministri Edi Rama, bashkë me kryepolicin Ardi Veliu dhe kreun e Emergjencave Civile, Haki Çakon pa nga afër shembjen e hotel “Mira Mare”, i cili shkaktoi viktima gjatë tërmetit. Teksa inspektonte nga larg, një prej gazetareve të pranishme, e pyeti kreun e qeverisë për dorëheqjen e kryebashkiakes së Durrësit disa orë më parë. Ndërsa në fjalën e tij, Rama e fokusoi përgjigjen e tij tek situata pas tërmetit duke fajësuar mediat se po përhapnin panik tek njerëzit.

    PYETJA: Kemi një dorëheqje të kryetares së bashkisë në një kohë emergjence, a është normale kjo?

    EDI RAMA: Ajo që mendoj se është me rëndësi, është që në këto momente të jepni sa më shumë energji pozitive. Mos të merremi me këto histori anësore. Ju jeni heronj që rrini në terren, por ata që ju drejtojnë me telefon nga redaksitë dhe të mbledhin në darkë lloj lloj sharlatanësh, sepse njerëzit janë të tmerruar. Një nga gjeneratorët e tmerrit janë ekranet e debateve pa kuptim dhe ato që mbushen me kronika sikur këtu ka rënë bomba në çdo shtëpi. Nuk ka rënë bomba në çdo shtëpi ka raste që s’janë dëmtuar fare. Ndaj është misioni juaj që të thoni; nuk ka rëndësi fare nëse ka plasur apo jo muri, por rëndësi ka që; a janë prekur apo jo kolonat? Kemi angazhuar gjithë këtë rrjet ndërkombëtar që njerëzit ta kenë me dy vula.Nëse nuk na ndihmoni, mos na e bëni punën të vështirë duke hedhur helm. I luajtët mëndsh njerëzit. Jo ju që jeni këtu në terren, por i drejtohem atyre që iu drejtojnë ju nga redaksitë.
  • 10:00

    Nuk i mati fjalët/ U kënaq me 50 viktima dhe ironizoi të mbijetuarit e tërmetit

    Mëngjesin e sotëm, kryebashkiakja e Durrësit Valbona Sako ka dhënë dorëheqjen nga posti i saj. Me disa rreshta, Sako shpjegonte në Facebook se shkak për largimin e saj ishin komentet negative që kishte marrë pas prononcimeve të saj në media.  Sipas Sakos, stresi në të cilat e fusnin komentet negative i kalonin fuqitë e saj dhe për këtë arsye ajo kishte vendosur që të largohej por jo pa falenderuar edhe një herë të fundit ata që e kishin mbështetur.

    Por çfarë tha kryebashkiakja e Durrësit, që shkaktoi një reagim kaq të fortë nga opinioni publik?

    Në një prononcim për gazetaren e “Top-Channel”, Valbona Sako u shpreh se tërmetet e tjera në botë kanë shkaktuar me mijëra viktima, kështu që duhet të jemi të kënaqur me kaq.

    Ky ishte një tërmet shkatërrimtar. Por të jemi të kënaqur edhe me 50 viktima pasi në raste të tjera kanë qenë mbi 100 viktima,”– dëgjohet të shprehet Sako. Menjëherë pas proconimit, Sako i doli në mbrojtje vetes duke ia hedhur fajin medias, e cila sipas saj ia kishte shtrembëruar fjalën.

    Në një tjetër prononcim, Sako po fliste për programin e qeverisë për të strehuar të prekurit nga tërmeti në hotele. Në prononcimin e saj në “Abc News”, kryebashkiakja e Durrësit tha se të prekurit nga tragjedia do të strehohen në hotele me pesë yje. Por, pa harruar të bëjë edhe ironi, kryebashkiakja shtoi se ato hotele, këta njerëz nuk do t’i paguanin dot as për pushime.

    Kaosi shkaktohet nga persona që nuk kanë nevojë, ndihmat shpërndahen në mënyrë të organizuar. I bëj thirrje qytetarëve të Durrësit të jenë të qetë. Punonjësit janë në terren për të evidentuar qytetarët të cilët kanë nevojë, 30 grupe i kemi të shpërndarë në terren.Qytetarët paraqiten në bashkinë e Durrësit, krijojmë një lëvizje të organizuar me transport dhe i çojmë në hotele në kushtet më të mira. Janë hotele me 5 yje, që në kushte normale zotërinjtë nuk do të mund t’i paguanin për pushime,”– shtoi Sako më tej.

  • 9:14

    Gafat me tërmetin/ Valbona Sako jep dorëheqjen si kryebashkiake e Durrësit

    Valbona Sako

    Kryebashkiakja e Durrësit, Valbona Sako ka dhënë dorëheqjen nga posti i saj, 6 muaj pasi u zgjodh. Me anë të një reagimi në rrjetin e saj social në Facebook, Sako ka arsyetuar se dorëheqja e saj ka ardhur si pasojë e reagimit negativ që ka pasur për dy prononcimet e saj të fundit në media.

    E lënduar nga reagimi i madh negativ ndaj një prononcimi që bëra, nën një stres që i kalon fuqitë e mia, jap dorëheqjen nga detyra e Kryetares së Bashkisë Durrës. Falenderoj nga zemra të gjithë ata që më besuan dhe shpresoj në mirëkuptimin e të gjithëve,”-shkruan Sako. 

Shto Koment