Aktualitet

Ngritja e SPAK/ Shtyhet afati për aplikimin, KLP: Kohë kandidatëve deri në 21 shkurt

Sot ishte afati i fundit për prokurorët që duan të ishin pjesë e SPAK të dorëzonin kandidaturën e tyre. Gara për SPAK është shtyrë deri më 21 shkurt.
Featured image of article: Ngritja e SPAK/ Shtyhet afati për aplikimin, KLP: Kohë kandidatëve deri në 21 shkurt Keshilli i Larte i Prokurorise
Përditësuar:

TIRANË-Këshilli i Lartë i Prokurorisë ka vendosur shtyrjen e afatit për pranimin e aplikimeve për SPAK deri me datën 21 Shkurt 2019 në mbledhjen e sotme.

Vendimi është marrë me 10 vota pro dhe me votën kundër të nënkryetarit, Alfred Balla.

Njoftimi i plotë:

Sot në mbledhjen plenare, KLP ka vendosur shtyrjen e afatit për pranimin e aplikimeve për SPAK deri me datën 21 Shkurt 2019.

Vendimi është marrë me 10 vota pro. Vota kundër e
N/Kryetarit të KLP, z. Alfred Balla.

KLP bën thirrje prokuroreve të shfrytëzojnë këtë afat dy javor për të paraqitur aplikimin e tyre.

Por çfarë është SPAK?

SPAK është njësia që do të ndjekë çështjet penale në emër të shtetit shqiptar kundër korrupsionit të niveleve të larta drejtuese dhe krimit të organizuar. SPAK ka të drejtë të përfaqësojë shtetin në të trija shkallët e gjyqësorit siç janë Gjykata e Shkallës së Parë, Gjykata e Apelit dhe ajo e Lartë.

SPAK është e pavarur në funksionim dhe ushtron detyrën përmes prokurorëve të Posaçëm që do të emërohen nga Këshilli i Lartë i Prokurorisë. Prokurorët e SPAK do të kenë një mandat 9-vjeçar dhe ky mandat mund të ndërpritet vetëm nga Inspektoriati i Lartë i Drejtësisë.

Gara për të aplikuar për të qënë pjesë e SPAK u hap më 9 janar të këtij viti për të 15 prokurorët që do të aplikonin. Por edhe pak para mbylljes së afatit, ka patur sërish kandidime. Këta janë  15 prokurorët që kandiduan: Anton Martini, Klodian Braho, Besnik Muçi, Eneid Nakucin, Edvin Kondilin, Dolorez Musabelliu, Eugen Beci, Dritan Prençi, Shkëlzen Cena, Vladimir Mara, Arben Kraja, Besim Hajdarmataj, Vatë Staka dhe Behar Dibra. E vetmja grua është prokurorja Dorina Bejko. (Lexo këtu)

Në ndihmë të tyre ka ardhur edhe prokurorja kroate Tamar Laptosh, e cila do të rrijë për rreth dy vite në Shqipëri, në mënyrë që të asistojë me eksperiencën e saj në hetimin e korrupsionit në nivelet më të larta të politikës. (Lexo këtu)

Ditën e sotme ajo ka takuar kreun e KPL-së, Gent Ibrahimi. Gjatë takimit ajo vuri theksin tek përzgjedhja e paanëshme ndaj prokurorëve që kanë aplikuar për SPAK. (Lexo këtu) 

Shto Koment