Aktualitet

E FRIKSHME/ Qytetarët shqiptarë dynden në tregje dhe markete për të kapur orën 13:00, pa maska, pa doreza e pa distancë sigurie

Pamjet që vijnë nga Tirana, Vlora, Fieri, Gjirokastra, Lushnja dhe Durrësi janë të frikshme. Rama zgjati afatin e qarkullimit të njerëzve deri në 13:00, e më pas me një bllokadë 40 orëshe që do të vijojë deri të hënën, por qytetarët kanë vazhduar të bëjnë secili siç di vetë. 
Featured image of article: E FRIKSHME/ Qytetarët shqiptarë dynden në tregje dhe markete për të kapur orën 13:00, pa maska, pa doreza e pa distancë sigurie Tregu i fruta-perimeve, Lushnje, foto nga një treg në Tiranë dhe koronavirus

TIRANË– Shqiptarët ende nuk janë të vetëdijshëm për rrezikun e përhapjes së koronavirusit, COVID-19. Pamjet që vijnë nga Tirana, Vlora, Fieri, Gjirokastra, Lushnja dhe Durrësi janë të frikshme. Në nxitim për të respektuar orarin, qytetarët nuk zbatojnë një nga rregullat bazë që është ruajtja e distancës 1 metër.

Fotografia është e njëjtë në të gjitha qytete, ku njerëzit mblidhen në radhë para dyqaneve, marketeve e farmacive për të blerë produkte, dhe qëndrojnë ngjitur njëri me tjetrin. Në Gjirokastër, problemi i radhës është edhe më “jetik”, pasi qytetarët qëndrojnë në radhë për të marrë një kafe.

Në Lushnje, ku janë dy të infektuar, qytetarë të shumtë janë mbledhur në treg, sikur të jetë një ditë normale. Ndërkohë që vatra e kuqe, Fieri, me 7 të infektuar, nuk i ka trembur qytetarët që lëvizin pa maska, pa dorëza dhe nuk ruajnë distancën.

Për më shumë bëhu pjesë e grupit më viral në Facebook, Dosja.al

E njëjta situatë është parë edhe në zonën e “21 dhjetorit” në Tiranë, ku qytetarët ngjitur me shoshoqin, kanë dalë për të bërë pazaret. Situata është keqkuptuar nga qytetarët, pas ndryshimit të orarit nga kryeministri Edi Rama. Rama zgjati afatin e qarkullimit të njerëzve deri në 13:00, e më pas me një bllokadë 40 orëshe që do të vijojë deri të hënën, por qytetarët kanë vazhduar të bëjnë secili siç di vetë.

(F.g./dosja.al)

  • 14:35

    Durrsakët të pabindur, teksa blejnë ushqime qëndrojnë pranë njëri-tjetrit, asnjë masë mbrojtëse

    Qytetarët e Durrësit gjatë orëve të para të ditës së sotme dolën nga banesat e tyre për të blerë ushqime dhe ilaçe, pasi afati i vendosur nga shteti ishte deri në orën 13:00. Por edhe këta të fundit, nuk iu bindën masave të marra nga qeveria për COVID-19. Në foton e siguruar nga Dosja.al shfaqen disa qytetarë në një dyqan, shumë pranë njëri-tjetrit dhe pa asnjë masë mbrojtëse.

  • 14:26

    VIDEO/ Sherr masiv për bukë në Korçë, gratë shtyhen, njëra ulëret, i shoqi: Merre, merre, të ikim!

    Pamje të frikshme vijnë nga Korça aty ku para një furre buke ka plasur një sherr masiv për bukë. Qytetarët shtyhen me njëri-tjetrin në radhë se kush do të marrë bukë para se furra të mbyllet, ndërkohë që pamjet janë të trishta. Dhjetëra qytetarë qëndrojnë ngjitur njëri me tjetrin, duke mos llogaritur as maska, as doreza, e as distancë sigurie. Në video dëgjohet një burrë që i thotë të shoqes: Merre, merre të ikim! (referuar bukës).

  • 12:56

    Gjirokastritët s’i tremben COVID-19/ Rrezikojnë jetën për një kafe, rrinë ngjitur njëri-tjetrit, pamje nga lagjet e qytetit

    Qytetarët shqiptarë prej më shumë se një javë janë vetëizoluar, pas përhapjes së COVID-19.

    Por çfarë ndodh në oraret ku lejohet që ata të dalin nga banesa? Shqiptarët nuk shkojnë nëpër supermarkete apo farmaci, për të blerë ushqime dhe ilaçe, por gjejnë mundësinë edhe për të blerë kafe. Siç shihet edhe në videon e publikuan nga Report Tv, qytetarët në Gjirokastër, rrezikojnë jetën për një kafe, pasi rrinë ngjitur pranë njëri-tjetrit për ta marrë atë.  Po kështu, edhe në tregjet e qytetit njerëzit shfaqen shumë pranë njëri tjetrit.

  • 12:54

    Policia dhe ushtria në aksion, shpërndajnë qytetarët në tregun e Kombinatit

    Foot nga një treg në Tiranë

    Pak minuta më parë Policia dhe ushtria kanë nisur një aksion, ku po shërndajnë qytetarët në tregun e Kombinatit, pasi në këtë treg ka një dyndje të madhe.  Qindra qytetarë të Tiranës kanë shkuar sot aty për të blerë ushqime, pasi pas orës 13:00 do të mbyllet gjithçka.

    Që nga ora 13:00 e ditës së sotme dhe deri në orën 05:00 të mëngjesit të së hënës nuk do të lejohet që asnjë person të dalë nga shtëpia pa autorizim. Kjo masë e qeveverisë ka sjellë edhe dyndje të qytetarëve nëpër tregjet e vendit.

  • 11:44

    'Qytetarët si fole blete', Basha nxjerr foton dhe shpreh zhgënjimin: Kjo s'është aspak mirë, duhet një analizë objektive për të organizuar e zbatuar izolimin

    Fotoja e postuar nga Basha

    Kryetari i Partisë Demokratike, Lulzim Basha apelon që qytertarët të qëndrojnë brenda dhe të evitojnë grumbullimet, pasi sipas tij, kjo është metoda më e sigurtë për të hapur COVID-19. Në një reagim në rrjetet sociale, teksa shpërndan një foto nga tregjet e kryeqytetit, Basha thekson se duhet një analizë objektive për zbatimin dhe organizimin e izolimit. Një apel për qytetarët nga kryedemokrati është “Qendroni brenda, t’i kthehemi sa më parë normalitetit”.

    Lulzim Basha: Kjo nuk është aspak mirë! Kjo është shumë e rrezikshme! Natyrisht që njerëzit duhet të blejnë gjërat e domosdoshme, duhet të marrin shërbimet esenciale, ju duhet të kryejnë disa pagesa, por grumbullime si këto janë të rrezikshme. Kjo është mënyrë e sigurtë për të përhapur virusin. Të tilla grumbullime zhvlerësojnë çdo sakrificë të bërë deri tani.

    Ndaj duhet një analizë objektive, bazuar mbi praktikat më efektive deri tani: Si mund të organizohet dhe zbatohet izolimi dhe distancimi sa më i disiplinuar dhe nga ana tjetër njerëzit të mund të marrin shërbimet jetike POR duke shmangur çdo dalje të panevojshme, radhët e gjata dhe grumbullimet masive. Asgjë nuk është e lehtë. Por gjithçka duhet bërë që të shmangim dhe ngadalësojmë sa mundemi përhapjen e COVID 19. Të dashur qytetarë! Qëndroni në shtëpi! Duke respektuar distancimin social, izolojmë virusin. Kështu i japim shans vetes dhe të afërmve tanë ta kalojmë me sa më pak pasoja këtë gjendje dhe t’i rikthehemi sa më parë normalitetit!

  • 11:21

    Foto skandaloze nga Tirana, qytetarët dynden nëpër tregjet e kryeqytetit për të blerë ushqime, asnjë masë mbrojtëse

    Kur e gjithë bota po përjeton momente të tmerrshme për shkak të COVID-19, dhe teksa përsëritet thirrja që qytetarët të rrinë në shtëpi, kjo është pamja që të ofron sot një nga tregjet në kryeqytet. Një numër i madh qytetarët janë dyndur në pazar për të bërë blerjet e tyre pasi do të qëndrojnë në karantinë deri mëngjesin e së hënës, ndërkohë që nuk respektojnë as distancën.

    Një qytetar ka denoncuar pranë agjencisë së lajmeve ‘BalkanWeb’ situatën në fjalë, e shenuar ne Kombinat, ndërkohë që sjell dhe imazhet e qarta të asaj se çfarë ndodh në mes të kryeqytetit. Kujtojmë se të shumtë kanë qenë ata qytetarë që nuk i janë bindur thirrjes së autoriteteve për të qëndruar në shtëpi. Sapo vinte fasha e orareve për të lëvizur, qytetarë të shumë dilnin nga shtëpia për të shijuar një shëtitje apo dhe ecje në grup, që në këto kohë është e ndaluar. Duke nisur nga ora 13:00 e ditës së sotme, për të vijuar deri në orën 05:00 të mëngjesit të së hënës, vendi do të jetë në shtetrrethim dhe nuk do të lejohet dalja nga shtëpia.

  • 11:06

    E frikshme/ Shqiptarët të pabindur, ja ç’po ndodh në tregun e Lushnjes, qytetarët qëndrojnë ngjitur me njëri-tjetrin, asnjë masë mbrojtëse

    Shqiptarët nuk i binden urdhrave të qeverisë, për mos-përhapjen e COVID-19. Fotoja e mëposhtme e siguruar nga Dosja.al është shkrepur në një treg të qytetit të Lushnjes, ku qytetarët shfaqen shumë afër pranë njëri-tjetrit dhe pa asnjë masë mbrojtëse. Qytetarët kanë dalë për të blerë ushqime, por me këto veprime ata po rrezikojnë jetën e tyre dhe të familjarëve.

    Tregu i fruta-perimeve, Lushnje

Shto Koment