Politike

“Jemi shkëmb graniti”/ Tritan Shehu ironizon Manastirliun për koronavirusin: Qesharake. S’kemi as karantinë

Sipas tij qeveria po fsheh paaftësinë e saj, duke thënë se kjo gjë i kujton atij sloganin e dikurshëm: “Jemi shkëmb graniti”.
Featured image of article: “Jemi shkëmb graniti”/ Tritan Shehu ironizon Manastirliun për koronavirusin: Qesharake. S’kemi as karantinë Tritan Shehu

TIRANË– Ish-deputeti demokrat, Tritan Shehu ka deklaruar se 36 rastet e testuara për koronavirusin, të cilat kanë rezultuar negative, nuk tregojnë asgjë. Sipas tij qeveria po fsheh paaftësinë e saj, duke thënë se kjo gjë i kujton atij sloganin e dikurshëm: “Jemi shkëmb graniti”. Në një postim në Facebook, Shehu shkruan se: Check up shkatërroi kujdesin parësor dhe laboratorët e tij, deri në funksionet bazë, gjë që shprehet edhe me pa fuqinë diagnostike.

POSTIMI I PLOTË I TRITAN SHEHUT:

“36 tampone” negative për Koronavirusin prej një laboratori nuk tregojnë asgjë!  Qeveria fsheh paaftësinë e saj, duke thënë indirekt se në Shqipëri nuk ka Koronavirus, kjo më kujton sloganin e dikurshem “Jemi shkëmb graniti”!! Dhe duan të na bëjnë ta besojmë këtë për të fshehur kolapsin e sistemit shëndetësor qoftë për të identifikuar të prekurit, deficitet e mëdha në burime financiare, njerëzore, teknike e materiale, mos përgatitjen për të përballuar epidemi ndaj të cilave ne jemi të ekspozuar si dhe vendet e tjera, së paku fqinjët.

Dhe më tej Task vazhdon të mburret: “Nuk kemi asnjë person në karantinë”!!! Qesharake, për të pasur të tillë duhen së paku dy kushte: Të kesh karantinën dhe të mund të diagnostikosh!! Duhet të jemi të qartë, Check up shkatërroi kujdesin parësor dhe laboratorët e tij, deri në funksionet bazë, gjë që shprehet edhe me pa fuqinë diagnostike.

PPP e laboratorëve në spitale i kanë “shkëputur” ata nga kërkesat komplekse duke thërrmuar spitalin, dëmtuar aktivitetin, autonominë e rolin e shtetit, vecanërisht për situata të tilla, me të cilat mjekësia është e mbushur. Për të mos folur për parandalimin, edukimin shendetësor, që vazhdojnë në “gjumë të thellë” e deri te terapitë intensive bosh në mjekë e mjete. Sa për ilustrim, aktualisht Qarku i Gjirokastrës ështe pa asnjë anestezist-reanimator! Në këto kushte duhet vetëm të shpresojmë…

Për më shumë bëhu pjesë e grupit më viral në Facebook, Dosja.al

 

Më herët, ministrja e Shëndetësisë dhe e Mbrojtjes Sociale, Ogerta Manastirliu ka deklaruar se Shqipëria deri në këto momente nuk është prekur nga koronavirusi, ku ka theksuar se janë kryer 36 raste testimi, të cilat kanë rezultuar negative.

Në rang global koronavirusi vijon të marrë jetë. Deri më tani janë regjistruar 3115 viktima dhe afro 100 mijë njerëz janë infektuar në botë. Italia e quajtur ndryshe edhe si vatra e koronavirusit në Europë, ka shënuar 52 viktima dhe mbi 2 mijë të infektuar, por në 24 orët e fundit ka shënuar një ulje të rasteve të reja nga virusi. Greqia ka mbyllur 28 shkolla për të shmangur koronavirusin, në Kinë së fundmi ka vdekur edhe një mjek, ndërsa rastet po shtohen shumë edhe në SHBA, ku Trump po merr masa të forta. Shqipëria nuk e ka pasur ende rastin e parë të infektuar.

(a.m/dosja.al)

Shto Koment