Aktualitet

Çfarë është koronavirusi? Përgjigjet e duhura për virusin që u mori jetën 4 njerëzve në Kinë, ja çfarë duhet të bëni!

Instituti i Shëndetit Publik në Shqipëri pas lajmeve të hidhura nga Kina ku kanë mbetur 4 viktima për shkak të virusit vdekjeprurës “Koronarvirusi” dhe frikës së përhapur në të gjithë botën, ka një njoftim të rëndësishëm, për simptomat dhe mënyrat e mbrojtjes ndaj tij.
Featured image of article: Çfarë është koronavirusi? Përgjigjet e duhura për virusin që u mori jetën 4 njerëzve në Kinë, ja çfarë duhet të bëni! Mjeket ne Kine

TIRANË– “Koronarvirusi” i ngjashëm me virusin “SARS” është përhapur shumë në të gjithë Kinën ku deri më tani u ka marrë jetën 4 njerëzve ndërsa ditën e djeshme u raportua edhe pacienti i parë i infektuar në SHBA nga ky virus.

Ndonëse po përhapet me ritme shumë të shpejta, në Shqipëri fatmirësisht nuk janë evidentuar raste të pacientëve të prekur. Por mes këtij paniku të përhapur në të gjithë botën, Instituti i Shëndetit Publik në Shqipëri ka publikuar disa njoftime të rëndësishme, që lidhen me koronavirusin, duke sqaruar se çfarë simptomash ka dhe sesi duhet të kujdesemi.

 Shpjegimi i plotë i ISHP-së:

Çfarë është koronavirusi?

Koronaviruset janë familja e viruseve të cilat shkaktojnë sëmundje nga një rrufë e lehtë deri në sëmundje më të rënda si Sindroma Respiratore e Lindjes së Mesme (Middle East Respiratory Syndrome (MERS) dhe Sindroma e Rëndë Respiratore Akute (Severe Acute Respiratory Syndrome SARS).

Çfarë është një koronavirus i ri?

Koronavirus i ri është (nCoV) është një lloj (shtam) i ri i koronavirusit i cili nuk është identifikuar më parë tek njerëzit.

A mund të infektohen njerëzit me koronavirusin e ri ku si burim infektimi janë kafshët?

Hetimet e hollësishme në Kinë në vitin 2002 kanë zbuluar se SARS-CoV u transmetua nga macet te njerëzit, kurse në Arabinë Saudite në vitin 2012 u zbulua MERS-CoV nga devetë te njerëzit. Njihen disa koronaviruse të cilët po qarkullojnë në kafshë, por që akoma nuk kanë infektuar njerëzit. Ndërkohë që survejanca në të gjithë botën përmirësohet, ka të ngjarë që të identifikohen më shumë koronaviruse.

Cilat janë simptomat e një personi të infektuar me koronavirus?

Simptomat varen nga virusi, por shenjat e zakonshme përfshijnë simptomat e aparatit të frymëmarrjes: ethe, kollë, gulçim dhe vështirësi në frymëmarrje. Në raste më të rënda, infeksioni mund të shkaktojë pneumoni, sindromë të rëndë respiratore akute, insuficiencë të veshkave, madje edhe vdekje.

A transmetohet koronavirusi nga njeriu tek njeriu?

Po, disa koronaviruse mund të trasnmetohen nga njeriu tek njeriu, zakonisht pas një kontakti të ngushtë/të afërt me një pacient të infektuar, në mjedisin e punës ose në një qendër të kujdesit shëndetësor.

Për më shumë bëhu pjesë e grupit më viral në Facebook, Dosja.al

A ka vaksinë për këtë lloj të ri të koronavirusit?

Kur një sëmundje është e re, nuk ka vaksinë për të, dhe mund të duhen disa vite derisa të prodhohet një vaksinë e re.

A ka një trajtim/mjekim për koronavirusin e ri?

Nuk ka një mjekim/trajtim specifik për sëmundjet e shkaktuara nga një koronavirus i ri. Megjithatë, shumë nga simptomat mund të trajtohen në varësi të gjendjes klinike të pacientit.

Çfarë duhet të bëj për t’u mbrojtur?

Rekomandimet standarde për të zvogëluar ekspozimin dhe transmetimin e një sërë sëmundjesh përfshijnë: ruajtjen e higjienës së duarve dhe të frymëmarrjes, praktikat e higjienës ushqimore, si dhe kur është e mundur shmangia e kontakteve të ngushta me çdo person që shfaq simptoma të sëmundjeve respiratore, si kollë apo teshtitje.

A janë personeli shëndetësor i riskuar nga koronavirusi i ri?

Po, ata mund të jenë të rrezikuar nga koronavirusi i ri, pasi personeli i kujdesit shëndetësor janë në kontakt me pacientët më shpesh sesa popullata e përgjithshme. OBSH-ja rekomandon që personeli i kujdesit shëndetësor të zbatojnë në mënyrë të vazhdueshme masat e duhura të parandalimit dhe kontrollit të infeksionit.

Cilat janë rekomandimet për vendet?

OBSH inkurajon të gjithë vendet të rrisin survejancën për infeksionet e rënda respiratore akute (SARI), të shikojnë me kujdes çdo model të pazakontë të këtyre infeksioneve ose pneumonisë dhe të njoftojnë OBSH-në për çdo rast të dyshuar ose konfirmuar të infeksionit me koronavirusin e ri. Vendet inkurajohen të vazhdojnë të forcojnë gatishmërinë e tyre për emergjencat shëndetësore në përputhje me Rregulloren Ndërkombëtare të Shëndetit (2005)

Prej gati një jave në Kinë është përhapur shumë “koronavirusi”, i ngjashëm me virusin “SARS” i cili u ka shkaktuar vdekjen 4 personave dhe ka prekur mbi 300 të tjerë në vend. Ndërkohë vetëm në kap pak ditë është shpallur edhe pacienti i parë i infektuar nga ‘koronavirusi’, duke shkaktuar shumë panik edhe tek qytetarët e tjerë amerikanë. Mediat e huaja kanë treguar se mjekët në Kinë po mbrohen maksimalisht në mbrojtjen nga virusi gjatë kontrollit të pacientëve.

A.C/Dosja.al 

Shto Koment