Aktualitet

Ditë shprese dhe çudish

Nesër në FSHS vazhdon greva e pedagogëve. Askush nuk mund të dalë mbi vullnetin e asamblesë demokratike të pedagogëve. Aq më pak mund të tallet me sakrificat e sa e sa studentëve protestues.
Featured image of article: Ditë shprese dhe çudish

Sot që herët në mëngjes pedagogët e Shkencave Sociale u mblodhën në oborrin e fakultetit për t’i dhënë karakter aktiv grevës së tyre. Me ta u bashkuan dalëngadalë shumë studentë dhe nisi një diskutim spontan për gjendjen e jetës universitare dhe të fakultetit tonë në veçanti. Çuditërisht dy pedagogë të fakultetit, në shkelje të vendimit të asamblesë dhe etikës pedagogjike, zgjodhën të futen në mësim me pak studentë. Siç thotë Mark Twain-i, “njeriu është e vetmja kafshë që skuqet, ose të paktën duhet ta bëjë.”

Rreth orës 10 në oborrin e fakultetit u bashkua kryeaktivisti i Lëvizjes Vetëvendosje Albin Kurti, i cili, i ftuar nga studentët, mbajti një ligjëratë në hollin e rezistencës për domosdoshmërinë e një universiteti të ri, emancipues dhe pa tarifa. Për çudi, dekani i fakultetit tonë ndjeu nevojën t’i justifikohej një dreqi e di se kujt, duke theksuar se për këtë ligjëratë ftesa nuk ishte bërë nga ai. Edhe më çuditshëm, kërkesës së studentëve për të mbajtur anë në konfliktin midis tyre dhe qeverisë, dekani iu përgjigj duke deklaruar se jo vetëm ai, por edhe vetë qeveria është pro tyre. Se nga e njeh dekani ynë vullnetin e qeverisë, vetëm ai mund ta dijë.

Në orën 11 në godinën Liria u mblodhën pedagogë nga fakultete dhe universitete publike të ndryshme. Për çudi, në sallë ishte rehatuar një deputete e PD, të cilës kushedi se ç’i kishte pjellë mendja. Nga podiumi iu bë e ditur se nuk mund të rrinte në atë sallë dhe se mbledhja e pedagogëve nuk kishte për synim të shërbente si daulle e makinacioneve partiake. Në fund të takimit u vendos, ndër të tjera, që t’u bëhej thirrje asambleve të të gjitha fakulteteve të mblidheshin dhe të ndiqnin shembullin e FSHS për të shpallur grevë.

Pak më vonë, duke huazuar faqen e Facebook-ut të një ish-vartëseje të vet, Gaztori dënoi pengmarrësit e FSHS, duke thurur teori konspirative çmendarake, pa i pranuar vetes se në FSHS dera nuk është mbyllur asnjë ditë dhe bojkoti dhe greva mbahen me vullnetin e shprehur demokratikisht të shumicës së studentëve dhe të pedagogëve.

Nesër në FSHS vazhdon greva e pedagogëve. Askush nuk mund të dalë mbi vullnetin e asamblesë demokratike të pedagogëve. Aq më pak mund të tallet me sakrificat e sa e sa studentëve protestues.

Shto Koment