Aktualitet

Dita e 15-të e grevës së urisë/ Gratë naftëtare nuk dalin nga uzina, kërkojnë me ngulm pagat e prapambetura, Hajdari: Turp për të gjithë ata që nuk reagojnë! Rama: Mbyllni grevën dhe bisedojmë

Ditë e vështirë për të gjithë naftëtarët e Ballshit dhe gratë e tyre që kanë hyrë sot në ditën e 15-të të greveës së urisë. Ato janë vizituar sot nga deputetja Rudina Hajdari e cila fajësoi të gjithë shoqërinë shqiptare për indiferencën, por pesha kryesore tha ajo bie mbi kryeministrin Edi Rama dhe ekzekutivin.
Featured image of article: Dita e 15-të e grevës së urisë/ Gratë naftëtare nuk dalin nga uzina, kërkojnë me ngulm pagat e prapambetura, Hajdari: Turp për të gjithë ata që nuk reagojnë! Rama: Mbyllni grevën dhe bisedojmë Naftetaret e Ballshit

BALLSH– Gratë naftëtare të Ballshit kanë hyrë sot në ditën e 15-të të grevës së tyre të urisë. Gjendja e tyre shëndetësore nuk është aspak e mirë, mirëpo pavarësisht kësaj ato vazhdojnë të qëndrojnë të ngujuara në ambientet e brendshme të uzinës prej nga kërkojnë pagat e prapambetura. Sot në Ballsh ka shkuar dhe deputetja Rudina Hajdari e cila ka parë nga afër gjendjen e grevistëve. Hajdari fajësoi të gjithë shoqërinë shqiptare për indiferencën, por pesha kryesore tha ajo bie mbi kryeministrin Edi Rama dhe ekzekutivin.Po ashtu, një tjetër thirrje iu ka ardhur nga kryeministri Edi Rama, i cili kërkon ndërprerjen e grevës, dhe saktëson se shteti dhe qeveria që ai drejton nuk kanë përgjegjësi për këtë çështje.

Naftëtarët e Ballshit kanë dalë në protestë prej afro një muaji, ku protestojnë për të marrë pagat e tyre të prapambetura dhe rifillimin e punës, por zëri i tyre nuk është dëgjuar dhe kështu morën aktin ekstrem. Fillmisht u futën në grevë burrat naftëtarë dhe më pas këta u zëvendësuan nga gratë, pasi u rëndua gjendja e tyre shëndetësore. Pak ditë më parë, kreu i sindikatës Sokol Dautaj së bashku me disa naftëtarë zhvilluan një takim me përfaqësuesit e uzinës së përpunimit të naftës në Ballsh, por takimi nuk ka përfunduar me sukses. Sipas Dautajt në takim u dhanë vetëm premtime boshe. Ndërkohë gjendja shëndetësore e naftëtarëve rëndohet nga dita në ditë.

Për më shumë bëhu pjesë e grupit më viral në Facebook, Dosja.al

(A.B;F.G/Dosja.al)

  • 11:46

    ‘Ejani t’ju ndihmojmë’/ Edi Rama nuk heq dorë nga thirrjet: Nuk kemi asgjë për të negociuar, nuk trashëgojmë mbi vete problemin e krijuar nga kompania private!

    Kryeministri Edi Rama ka bërë reagimin e dytë brenda orës për çështjen e grevës së urisë së naftëtarëve në Ballsh. Rama thotë se qeveria nuk është përgjegjëse për ta, pasi është problem i privatit, ndërsa kërkon që t’i ndihmojë, por sipas tij, ata nuk mund të ndihmohen nëse nuk heqin dorë nga greva e urisë.

    Edhe një herë: Nuk ju kam ftuar në asnjë negociatë, sepse nuk kemi asgjë për të negociuar pasi qeveria as që e ka shkaktuar hallin tuaj, as nuk trashëgon mbi vete problemin e krijuar nga kompania private! Rafineria nuk është e shtetit. Ju lutem na jepni mundësinë t’ju ndihmojmë. Ideja e punonjësve të një kompanie private mund të bëjë grevë kundër qeverisë për detyrimet e sipërmarrësve privat është e gabuar. Ju nuk e doni daljen në asistencë dhe e mirëkuptojmë, por ju’a përsëris, pa mbyllur grevën nuk ju’a qajmë dot hallin konkretisht përtej asistencës!”-tha Rama. 

  • 11:20

    Rama vijon sërish me thirrje për naftëtarët e Ballshit: Qeveria nuk është armiku po aleati juaj, askush nuk ju ofron lëmoshë. Mbyllni grevën!

    Kryeministri Edi Rama ka vijuar sërish me thirrje kundrejt naftëtarëve të Ballshit. Përmes një mesazhi në Twitter, Rama shkruan se askush nuk po i ofron lëmoshë e se e vetmja pengesë është pikërisht greva e tyre duke i bërë thirrje që ta mbyllin. Të dashura motra greviste të Ballshit! Askush nuk ju kërkon të dorëzoheni, qeveria nuk është armiku po aleati juaj dhe askush nuk ju ofron lëmoshë, ne jemi gati të qajmë hallin tuaj së bashku! E vetmja pengesë mes nesh është greva juaj. Mbyllni grevën dhe unë do jem aty menjëherë.

    Kreu i qeverisë i kërkon grevisteve që të mos gënjehen nga ata që ai i quan krokodila. “Mos u gënjeni nga krokodilët që lotojnë për ju e duan t’ju përdorin kundër qeverisë! Qeveria është e juaja, por nuk mund të bisedojë me ju nën presion e me ultimatume! Grevat bëhen për t’u dëgjuar, jo për të marrë me zor atë që ke në mendje. Ne ju kemi dëgjuar e po ju presim juve!”

  • 9:50

    Rudina Hajdari takim me naftëtarët në Rafinerinë e Ballshit, gratë: Pyete kryeministrin se çfarë ofron për ne

    Ditën e sotme deputetja Rudina Hajdari ka shkuar në Ballsh aty ku po takohet me naftëtarët e ngujuar në ambientet e rafinerisë. Naftëtarët: Duam zgjidhje, Ilir Bejtja të gjejë lekët. Pyete kryeministrin se çfarë ofron për ne. Na likuidoni pagat e prapambetura, kaq duam. Na ndihmoni dhe ngrini zërin për ne në parlament. 

    Deputetja tha: Dua t’ju falenderoj për sakrificën, pasi ju s’luftoni vetëm për vete, por për shumë njerëz të tjerë. Qeveria po sillet shumë arrogante dhe nuk ju plotësojnë nevojat minimale. Ju jeni këtu për një rrogë për të mbajtur fëmijët tuajë. Të mos ketë një reagim për mua është e turpshme, për të gjithë si shoqëri, por pesha kryesore i bie Edi Ramës, se kanë lënë familje të tëra pa rrogë se ata lajnë hesapet e tyre. 

Shto Koment