Sociale

Dëmtohet pylli në Krujë, bashkia jep lejen dhe kundërshtohet nga banorët (VD)

Prerja e pyjeve është e ndaluar me ligj dhe rastet kur ka prerje duhet marrë leje nga inxhinieri specialist me leje të veçanta nga AZHBR, Inspektoriati i Mjedisit dhe Bashkia.

KRUJË- Ka disa ditë që ka filluar prerja e pyjeve në lumin Ishëm. Mësohet se prerja e pyjeve është bërë nga një firmë nga Mamurrasi, Joti sh.p.k, e cila ka marrë leje nga Bashkia Krujë.

Më tej shtohet se të gjitha lëndët drusore do i marrë firma Joti X sh.p.k, ndërsa shkurret do t’u jepen shkollave për ngrohje. Por edhe pse bashkia ka dhënë një leje për këtë firmë, prerja e pyjeve është e ndaluar me ligj dhe rastet kur ka prerje duhet marrë leje nga inxhinieri specialist me leje të veçanta nga AZHBR, Inspektoriati i Mjedisit dhe Bashkia.

Por edhe pse duhen të gjitha këto leje, në rastin konkret firma është mjaftuar vetëm me lejen e bashkisë dhe do të presë të gjitha pyjet përgjatë lumit Ishëm, nga Ura e Gjoles deri në vendin e quajtur Ura e Gjermanes në një gjatësi prej 1.5 kilometra.

Këto pyje përveç rolit të pazëvendësueshëm që kanë për ruajtjen e mjedisit të pastër kanë edhe një rol tjetër të pazëvendësueshem atë të mbrojtjes së tokës nga erozioni i cili ka filuar të shfaqet.

Në mbrojtje të këtyre veprimeve të paligjshme ka dalë dhe Inspektori i Policisë së zonës Bilaj Hir Babasi i cili na paraqet një copë letër e duke na thënë se ky është tenderi që ka fituar firma. Por banorët e fshatrave Bilaj, Hasan, Ura e Gjoles etj e kanë kundërshtuar me forcë këtë masakër dhe kërkojnë që organet shtetërore të marrin masa urgjente.

Banorët i bëjnë thirrje shtetit të veprojë për të parandaluar këtë, që e quajnë një vjedhje prej disa milionë euro dhe sipas tyre do sjellë pasoja të parekuperueshme për të gjithë rrethin e Krujës.

(Dosja.al)

Shto Koment