Sport

Daja: “Dua suksese edhe me Partizanin, do të flas për derbin kur të vijë ndeshja”

“Kemi entuziazëm brenda ekipit dhe në anën psikologjike jemi pak më mirë se Skënderbeu. Mendoj me të gjithë mënyrat që të dalim me tre pikë nga ndeshja”
Featured image of article: Daja: “Dua suksese edhe me Partizanin, do të flas për derbin kur të vijë ndeshja”

TIRANE – Në kuadër të javës së 5-të të Superiores, trajneri Ilir Daja, që aktualisht drejton Partizanin, do të përballet me të shkuarën e tij. Nesër, në orën 16:45, “të kuqtë” do të përballen në “Elbasan Arena” me skuadrën korçare të Skënderbeut, të cilën trajneri kryeqytetas e ka stërvitur sezonin e shkuar.

Trajneri Daja i Partizanit, në konferencën e zakonshme për shtyp para kësaj ndeshjeje, foli për vështirësitë e përballjes së nesërme dhe theksoi se dëshiron që sukseset e arritura me korçarët, dëshiron t’i përsërisë edhe me “të kuqtë”.

Sa e vështirë është të përgatisësh ndeshjet në një distancë kohore kaq të shkurtër?

“Kemi rritje nga java në javë, por paralelisht kemi edhe shumë gjëra për të përmirësuar. Mendoj se do të kemi vështirësi, jo vetëm ne, por edhe ekipet e tjera, për shkak të ngjeshjes së kalendarit në këtë moment. Akoma më shumë e ndjejmë ne, pasi kemi pasur një grup të limituar edhe për shkak të problemeve”.

Skënderbeu që do t’ju vizitojë nesër, nuk është ai i kohëve të arta që drejtohej nga ju…
”Koeficienti i vështirësisë do të jetë prezent nesër, jo vetëm për këto që citova më parë, por edhe sepse Skënderbeu në transferta ka bërë paraqitja të mira. Në Durrës dhe Ballsh kanë marrë pikë dhe mendoj se nesër do të kemi një ndeshje të vështirë. Gjithsesi kemi entuziazëm brenda dhe në anën psikologjike jemi pak më mirë se Skënderbeu”.

Për më shumë bëhu pjesë e grupit më viral në Facebook, Dosja.al

Sa e vështirë është të luash kundër skuadrës që drejtove deri pak muaj më parë?

“Dihet që me Skënderbeun kam kulmin e karrierës time dhe do dëshiroja ta bëja të njëjtën gjë me Partizanin. Kam kaluar shumë mirë në atë qytet, ku edukata dhe kultura janë prezent në çdo moment. Nesër i kemi kundërshtarë dhe ashtu siç kam bërë me Skënderbeun duke dhënë maksimumin, ashtu do bëj edhe me Partizanin. Ky është profesioni ynë. Nesër do mendoj me të gjithë mënyrat që bashkë me ekipin të dalim me tre pikë nga ndeshja”.

A keni arritur të rikuperoni ndonjë nga të dëmtuarit për ndeshjen e nesërme?
”Kemi rikthime, por jo në ndeshjen e nesërme me Skënderbeun. Çdo rikthim do kohën e vet, ndaj nuk do të rrezikojmë asnjë prej lojtarëve të rikthyer dhe do të vazhdojmë me kontingjentin tjetër që kemi në dispozicion”.

Keni filluar t’i ndjeni ethet e derbit me Tiranën?
”Kam kërkuar nga stafi të fokusohemi te ndeshja me Skënderbeun. Ajo është shumë e rëndësishme për ne dhe për vazhdimësinë. Nëse do flisja për derbin do bëja të kundërtën e asaj që u kam kërkuar lojtarëve. Kështu që do të flas për derbin në momentin që do të vijë ndeshja. Nëse vazhdojmë të bëjmë të njëjtën gjë, besoj se gjërat do të jenë në favorin tonë”.

B.T (Dosja.al)

Shto Koment