Politike

COVID-19/ Shkodra “vatër e kuqe”, Meta thirrje qytetarëve: Respektoni protokollet shëndetësore, merrni parasysh këshillat e mjekëve

Meta thirrje shqiptarëve që të respektojnë masat e marra nga qeveria për COVID-19.
Featured image of article: COVID-19/ Shkodra “vatër e kuqe”, Meta thirrje qytetarëve: Respektoni protokollet shëndetësore, merrni parasysh këshillat e mjekëve Ilir Meta

Tiranë-Presidenti i vendit, Ilir Meta iu ka bërë thirrje qytetarëve që të respektojnë masat e marra nga qeveria për COVID-19. Presidenti shprehet se qytetarët e Shkodrës në veçanti duhet të  respektojnë me përpikmëri protokollet shëndetësore, këshillat e stafeve të specializuara mjekësore, pasi në këtën qytet po rritet ndjeshëm numri i personave të infektuar.

Reagimi:

Nisur nga përkeqësimi i treguesve të përhapjes së pandemisë 🔴 #COVID19 në Bashkinë dhe Qarkun e Shkodrës, zhvillova sot biseda telefonike me Prefektin e Qarkut, z.Çesk Millja dhe Kryetaren e Bashkisë, znj.Voltana Ademi.
U informova prej tyre për situatën dhe përpjekjet e autoriteteve vendore për të ndihmuar banorët e prekur dhe masat e marra për të parandaluar përkeqësimin e mëtejshëm të situatës. Duke u shprehur solidaritetin dhe mbështetjen time për të gjithë banorët e Qarkut Shkodër të prekur nga 🔴#COVID19, të cilëve ju uroj shërim të shpejtë, theksova domosdoshmërinë e rritjes së efikasitetit të masave që duhen marrë për mbrojtjen e shëndetit të çdo qytetari.
Për situatën në Bashkinë dhe Qarkun e Shkodrës, zhvillova sot edhe një bisedë telefonike me ministren e Shëndetësisë, znj. Ogerta Manastirliu. Theksova rëndësinë e forcimit të mëtejshëm të bashkëpunimit midis autoriteteve qendrore dhe vendore, me qëllim izolimin e përhapjes së mëtejshme të këtyre rasteve dhe ndërgjegjësimin e qytetarëve për respektimin e të gjitha udhëzimeve dhe kufizimeve të bëra publike për shkak të pandemisë globale 🔴#COVID19.
Bashkëpunimi më i ngushtë midis qytetarëve dhe institucioneve është garanci kryesore për përballimin sa më efikas të kësaj pandemie.
Duke theksuar se shëndeti i çdo qytetari është prioriteti ynë absolut, dhe se në këtë situatë kërkohet përgjegjshmëri maksimale, bashkëpunim, profesionalizëm, përkushtim dhe transparencë, i ftoj edhe njëherë të gjithë qytetarët, në veçanti të Qarkut Shkodër, të respektojnë me përpikmëri protokollet shëndetësore, këshillat e stafeve të specializuara mjekësore, të ndjekin dhe të zbatojnë vetëm sugjerimet e institucioneve shtetërore. 🇦🇱

 

Për më shumë bëhu pjesë e grupit më viral në Facebook, Dosja.al

Shqipëria vijon luftën me COVID-19. Numri i të infektuarve ka shkuar në  377 persona dhe deri më tani janë shënuar 21 viktima. Ministria e Shëndetësisë njoftoi sot se gjatë 24 orëve të fundit janë konfirmuar 16 raste të reja me COVID-19. Harta e rasteve të reja është zgjeruar sot në Tiranë, Shkodër dhe në Has. Deri më tani në Shkodër janë shënuar 6 raste të reja, mes tyre dhe një infermier që mund të ketë infektuar dhjetra persona të tjerë.

J.V/Dosja.al 

Shto Koment