BlogDikur

Çanta me ëndrra somaleze

Një djalë i ri është gjetur sot në mëngjes nga barinjtë e Asim Zenelit, në një kanal, i ngrënë nga egërsirat. Çantën nuk e lëshonte nga dora edhe kur e kafshonin bishat. E kish mbushur me ëndrrra. Të gjitha europiane!
Featured image of article: Çanta me ëndrra somaleze Ilir Kadia

Një djalë i ri është gjetur sot në mëngjes nga barinjtë e Asim Zenelit, në një kanal, i ngrënë nga egërsirat.

Qentë dhe bishat e tjera të Antigonesë. Policia e Gjirokastrës tha se nuk ka patur shenja të tjera dhune! Kafshët e kanë ngrënë, por pasi është mbytur në kanal. Ka dashur të kalojë nga njëra anë e fushës në anën tjetër por ka rënë në llucë me çantën mbi shpinë.

S’ka dalë dot se nuk e dinte ç’ish lluca jonë. Mes errësirës i ziu njeri ka luftuar me vdekjen por ajo e ka mposhtur. Ka thirrur për ndihmë në të gjitha gjuhët e botës por i janë përgjigjur vetëm qentë, ujqit dhe çakenjtë që i kanë dhënë dorën e fundit.

Amaneti qënka dëgjuar në shqip nga barinjtë: “Mbeç more shok mbeç, në mes të Antigonesë! Të fala nënesë…” Kanë shkuar e i kanë hapur çantën sot në mëngjes policët dhe i kanë gjetur një dokument me fotografi lëshuar nga një kamp refugjatësh në Greqi.

I ziu djale quhej Abdurrahman Muhamet Isuf nga Somalia dhe ishte vetëm 25 vjeç. Çantën nuk e lëshonte nga dora edhe kur e kafshonin bishat. E kish mbushur me ëndrrra. Të gjitha europiane!

Kish paguar shtrenjtë që përmes Shqipërisë të shkonte në Itali. Aty kish kostumin që do vishte për foton sa të cekte Italinë! E t’ia çonte nënës. Shkonte udhë e pa udhë që të mos e kapte policia e Shqipërisë dhe ta nxirrte në mëngjes në televizor ashtu me shokët e tjerë ulur në tokë si qen! E ta njihte nëna a motra e të lemerisnin botën me të qara!

Ka besuar se shqipëtarët janë mikpritës dhe refugjatëve u japin bukë, kripë e zemër! Se edhe ata vetë kanë qënë vetëm pak vite më parë si ta dhe e nuk do kenë harruar Gramozin me borë e detin me dallgë plot me kufoma!

Por se ka ditur se shqipëtari harron shpejt ç’ka qenë! U ka besuar dritave në errësirë dhe ka pandehur se janë të shtëpive me ujë, bukë e shtrat të ngrohtë.

Por paskan qënë sy bishash! Ka besuar se kur të mësonin që ai ish Abdurrahman, që e kish baba Muhametin dhe stërgjysh Isufin, dyfish do jepnin strehë në tokë shqipëtare, sa të takonte një vëlla mysliman!

… Çfarë do të bëjë policia jonë me trupin e djaloshit 25 vjeçar nga Somalia?! Ta kthejë në kampin grek?! Ta fusë në frigorifer e të presë familjen të vije ta marrë?! Unë them të marre leje nga familja e tij e ta varrosë pranë “Asim Zenelit” dhe t’ë shkruajë si epitaf fjalët:

“Këtu prehet Abdurrahmani bashkë me çantën e tij të ëndrrave!”

E risjell këtë shkrim në nderim të kujtimit të 14 shtetasve afganë dhe somalezë të cilët i shtypi treni në Maqedoni tek flinin mbi shina në mesnatë.

Shto Koment