Ekonomi

Blloqet e lira të naftës, afati i ri për Bllokun E dhe B është 21 qershori

Sipas njoftimit të fundit të AKBN investitorët e interesuar mund të dërgojnë pyetje lidhur me këto blloqe deri më datë 15 qershor ndërkohë që afati i fundit për përgjigje është data 16 qershor.
Featured image of article: Blloqet e lira të naftës, afati i ri për Bllokun E dhe B është 21 qershori Nafte

Agjencia Kombëtare e Burimeve të Natyrës bëri me dije se afati i ri për shprehjen e interesit për dy blloqet e lira të naftës të nxjerra për investitorët është data 21 qershor.

Më herët me një urdhër të marsit të këtij viti të Ministrisë së Infrastrukturës dhe Energjisë u la si afat data 22 prill por duket se për shkak të situatës dhe zgjedhjeve urdhri i parë u amendua për të shtyrë këtë afat më tej.

Sipas njoftimit të fundit të AKBN investitorët e interesuar mund të dërgojnë pyetje lidhur me këto blloqe deri më datë 15 qershor ndërkohë që afati i fundit për përgjigje është data 16 qershor.

Por cilat janë specifikat e dy Blloqeve të lira të naftës të nxjerra për shprehje interesi. Blloku B më herët ka qenë pjesë e një marrëveshje të shtetit shqiptar me disa kompani. Fillimisht me SHELL por që pas disa problematikave që u shfaqën kompania hoqi dorë dhe Blloku i kaloi më pas Petromanas. Edhe kjo e fundit u largua në vitin 2017 nga Shqipëria. Tashmë Blloku B është i lirë për kërkim. Ai ndodhet në zonën e Rodonit në pjesën perëndimore të vendit dhe ka një sipërfaqe prej 776 km2.

Blloku E nga ana tjetër Blloku E ndodhet në pjesën qendrore të vendit dhe mbulon një sipërfaqe prej 700 km2.

Për më shumë bëhu pjesë e grupit më viral në Facebook, Dosja.al

Kjo nuk është hera e parë që Shqipëria nxjerr blloqe naftë të lira por çmimet e ulëta në bursa në disa raste dhe pandemia në këtë vit të fundit e kanë bërë të vakët interesin e kompanive për investim jo vetëm në Shqipëri por globalisht.

Vetëm pak kohë më parë u ndryshua legjislacioni lidhur me përfitimet që shteti merr nga marrëveshjet që lidh me kompanitë që shfrytëzojnë naftën në vend duke kërkuar që të përfitohet që në fuçinë e parë që nxirret. Marrëveshja e fundit e lidhur me një kompani të huaj për shfrytëzimin e një Blloku nafte është ajo me italianen ENI ku u nënshkrua për kërkim dhe shfrytëzim të bllokut të Dumresë.

Shqipëria tentoi për disa vite me radhë të ndiqte një politikë me dyer të hapura për investitorët lidhur me blloqet e naftës, por interesi ka qenë i ulët dhe duket se kjo e ka rikthyer edhe një herë në praktikën e shpalljes së Blloqeve specifikë për garë.

MONITOR

Shto Koment