Muharrem Plaku
BULQIZË– Muharrem Plaku, minator në galerinë e subjektit minerar KADURTEX sh.p.k.. ka mbetur i bllokuar që në orën 12:00 të paradites së sotme. Mësohet se një masiv minerali është rrëzuar dhe për pasojë ka bllokuar hyrjen e galerisë, duke lënë dhe minatorin Plaku brenda saj.
Grupi i avari-shpëtimit të minierave po punojnë për pastrimin e galerisë dhe ardhjen në ndihmë të punëtorit, i cili tashmë ka më shumë se katër orë i bllokuar dhe nuk dihet nëse është ende gjallë.
Galeria në fjalë është e subjektit minerar KADURTEX sh.p.k.. Kapllan Durici rezulton të jetë administrator i kompanisë me bashkëpronarë vëllezërit e tij, Myfit dhe Ilber Duriçi. Nga përgjegjësit e këtij subjekti nuk ka pasur asnjë reagim në lidhje me bllokimin e minatorit. Kjo nuk është hera e parë që minatorët bllokohen brenda galerive.
Vetëm më 18 gusht, një 20-vjeçar, punonjës në minierën e Qafë Barit në Fushë Arrëz u aksidentua për vdekje. Edhe në muajin maj të këtij viti, Eltion Alla, babai i një djali të vogël hyri galeritë e kromit në Bulqizë, për të mos dalë më i gjallë që aty.
(A.B;F.m/Dosja.al)
-
15:39
I bllokuar prej katër orësh në galeri, publikohet fotoja e minatorit Muharrem Plaku, nuk dihet nëse është gjallë
Muharrem Plaku Personi që po shikoni në foto është Muharrem Plaku, minatori që ka mbetur i bllokuar në galerinë “Kadurtex” në Bulqizë. Që nga ora 12:00, minatori rreth 60 vjeç ka mbetur i bllokuar pasi është shembur një masiv me minerale.
-
13:30
NJOFTIMI I POLICISË:
Pamje nga Bulqiza NJOFTIMI I POLICISË:
Me datë 15.09.2021, rreth orës 12.10, në një subjekt minerar në Bulqizë, ka patur një rënie të një masivi minerali dhe nga informacionet paraprake të punëtorëve, dyshohet se ka mbetur i bllokuar në galeri një punëtor.Grupi i avari-shpëtimit të minierave po punojnë për pastrimin e galerisë dhe ardhjen në ndihmë të punëtorit që dyshohet se ka mbetur në galeri.Grupi hetimor vijon hetimet në vendngjarje për zbardhjen e shkaqeve të ngjarjes.
