Aktualitet

Arta Vorpsi injoron Presidentin, s’betohet para Metës por tek noterja private, shkresën ia nis me Postë

  • Tedi Blushi ironizon Arta Vorpsin: Meta nuk ndalon askënd të betohet as tek parukierja
  • Basha nga Saranda: Grusht i pastër institucional
  • PD: Ushtare e pushtetit të Ramës, kundër shtetit të së drejtës
  • Biba: Veprim i njëanshëm, Arta që njoh unë nuk e bën ( Fshin postimin)
  • Betimi i Arta Vorpsit/ Balla nuk e komenton, tregon se çfarë duhet të bëjë Kuvendi
  • Betimi i Vorpsit tek noterja/ Zëri i Amerikës: Thellon kaosin e Kushtetueses
  • Dhoma e Noterëve: Xhemalçe bëri detyrën, do e bënte për çdo qytetar
  • E PLOTË/ Kuvendi projekt-rezolutë për dekretin e Metës, diskutohet nesër
  • Anëtarja e re e Gjykatës Kushtetuese, Arta Vorpsi shkel hapur Kushtetutën duke shmangur betimin tek presidenti Ilir Meta. Vorpsi është betuar ditën e sotme në një notere private. Presidenca ka ironizuar aktin, ndërsa socialisti Denar Biba e ka cilësuar si ‘veprim të njëanshëm’.
    Featured image of article: Arta Vorpsi injoron Presidentin, s’betohet para Metës por tek noterja private, shkresën ia nis me Postë Gjykata Kushtetuese, Ilir Meta dhe Arta Vorpsi

    TIRANE- Një ditë pasi presidenti Ilir Meta i mbylli derën për të organizuar një ceremoni betimi, Arta Vorpsi, anëtarja e Gjykatës Kushtetuese, e cila u zgjodh nga Këshilli i Emërimeve në Drejtësi, injoron zyrën e presidentit dhe shkon e betohet tek zyra e një notereje. “Me dorën mbi Kushtetutë, betohem. Betohem se gjatë detyrës do t’i qëndroj besnike Kushteturës”, është shprehur Arta Vorpsi para noteres Miranda Xhemalçe, ndërsa një orë më vonë ajo ka shkuar në zyrën e saj në Gjykatën Kushtetuese.

    Veprimi i Vorpsit bie ndesh hapur me Kushtetutën e Shqipërisë, ku në nenin 8, ku për fillimin e detyrës  (ndryshuar pjesërisht pika 3 me ligjin nr.99/2016, neni 7) thuhet se:

    “Gjyqtari i Gjykatës Kushtetuese fillon detyrën pasi bën betimin para Presidentit të Republikës së Shqipërisë. Formula e betimit është: “Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë”. Mandati i gjyqtarit të Gjykatës Kushtetuese fillon nga data e betimit dhe mbaron në datën e njëjtë të atij muaji të vitit të nëntë, përveç rasteve kur Kushtetuta parashikon ndryshe. Gjyqtari i Gjykatës Kushtetuese vazhdon në detyrë deri në emërimin e pasardhësit të tij.”-ndërkohë që nuk shkruhet në asnjë paragraf që anëtari/ja, mund të shmangë presidentin për këtë ceremoni.

    Shkresën, Vorpsi Metës ia ka dërguar me postë, ndërkohë që një kopje ia ka dërguar Këshillit të Emërimeve në Drejtësi që e zgjodhi dhe Gjykatës Kushtetuese.

    Betimi i Arta Vorpsit:

    Unë e nënshkruara Arta Vorpsi në cilësinë e gjyqtares së Gjykatës Kushtetuese të emëruar, bazuar në vendimin nr. 132 datë 21.09.2019 të Këshillit të Emërimeve në Drejtësi, botuar në Fletoren Zyrtare nr.151/2019 si dhe në nenin 8 të ligjit nr. 8577/2000 “Për organizimin dhe funksionimin e Gjykatës Kushtetuese të Republikës së Shqipërisë”, me vullnetin dhe gatishmërinë për të ushtruar menjëherë funksionin e gjyqtarit kushtetues dhe me dorën e vendosur mbi kushtetutë. “Betohem se gjatë kryerjes së detyrave të mua do t’i qëndroj kurdoherë besnik Kushtetutës së Republikës së Shqipërisë” Kjo deklaratë hartohet në 4 kopje, 1 kopje mbahet nga deklaruesi ndërsa 1 kpje i dërgohet presidentit të Republikës, 1 kopje i dërgohet Këshillit të Emërimeve në Drejtësi dhe 1 kopje i dërghet Gjykatës Kushtetuese.

    Por si nisi ngërçi? 

    Mbrëmjen e djeshme, në një konferencë për mediat, presidenti Ilir Meta, la të kuptohej se nuk do të organizonte një ceremoni betimi për Vorpsin. Meta e quajti zgjedhjen dhe publikimin më pas në Fletoren Zyrtare të Vorpsit, një “publikim kontrabandë”.

    Jam shumë i qartë për këtë çështje. Kuvendi është i mirëpritur të komunikojë zyrtarisht me institucionin e Presidentit, dhe jemi të hapur për të bashkëpunuar në respekt të ksuhtetutës dhe detyrimeve kushtetuese dhe kjo është një çështje e mbyllur dhe shumë e qartë. Ju duhet të dini se çfarë publikohet në fletoren zyrtare dhe këto janë me ligj, çdo publikim kontrabandë, padyshim që nuk sjell asnjë detyrim për presidentin në zbatim të detyrimeve të tij kushtetuese. Ka kushtetutë mbi çdo gjë tjetër në republikë në mënyrë të veçantë për presidentin që është betuar me dorë mbi kushtetutë, unë me këtë gjë nuk bëj shaka”, tha Meta.

    Si u zgjodh Arta Vorpsi? 

    Arta Vorpsi u zgjodh automatikisht anëtare në Gjykatën Kushtetuese, pasi ishte e para në listë nga Këshilli i Emërimeve në Drejtësi. Gjykata Kushtetuese tashmë ka 6 anëtarë. Pas Vitore Tushës, e cila qëndroi në detyrë pasi kaloi të gjitha fazat e Vettingun, janë emëruar dhe 5 anëtarë të rinj. Kushtetuesja me 6 anëtarë do të jetë funksionale dhe të gjithë anëtarët do të nisin punën pas betimit tek Presidenti i Republikës. Vitore Tusha, Besnik Muçi, Arta Vorpsi, Elsa Toska, Marsida Xhaferllari dhe Fiona Papajorgji janë anëtarët e gjykatës më të lartë në Shqipëri dhe do mbrojnë Kushtetutën. Gjykata Kushtetuese ka 2 vite që nuk është funksionale për shkak të procesit të Vettingut, që solli “djegien” dhe shkarkimin e të gjithë anëtarëve të tjerë.

    (F.g/dosja.al)

    • 15:51

      E PLOTË/ Kuvendi projekt-rezolutë për dekretin e Metës, diskutohet nesër

      Ditën e nesërme në orën 10:00 Kuvendi do të zhvillojë një seancë të jashtëzakonshme, parlamentare, pas ngërçit të krijuar me Gjykatën Kushtetuese. Sipas burimeve të Dosja.al mësohet se sot në orën 13:00 është mbledhur Konferenca e Kryetarëve ku kanë vendosur që nesër të ketë seancë dhe do të hartohet një projektrezolutë, ku do reflektohet qëndrimi i Kuvendit në raport me vendimin e Presidentit të Republikës Ilir Meta që dekretoi Marsida Xhaferllarin si anëtare te Gjykatës Kushtetuese.

      Në rend dite për nesër do të jenë diskutime për dekretin e Presidentit për caktimin e Marsida Xhafellarit si anëtare të Gjykates Kushtetuese, i cili është cilësuar nga maxhoranca si i papranueshëm. Në projekt-rezolutën e hartuar nga socialistët, ata i bëjnë thirrje Presidentit që të të heqë dorë nga tentativat dhe aktet që bllokojnë zbatimin e Reformës në Drejtësi.

       “Kuvendi i Shqipërisë i bën thirrje Presidentit të Republikës të ushtrojë detyrat e tij kushtetuese në lidhje me fillimin e detyrës së gjyqtareve kushtetuese Znj. Arta Vorpsi, Znj. Elsa Toska dhe Znj. Fiona Papajorgji. Kuvendi i Shqipërisë i bën thirrje Presidentit të Republikës të heqë dorë nga tentativat dhe aktet që bllokojnë zbatimin e Reformës në Drejtësi dhe funksionimin normal të organeve kushtetuese ku një prej më të rëndësishmeve është Gjykata Kushtetuese.Kuvendi i Shqipërisë në mënyrë të përsëritur i bën thirrje Presidentit të Republikës të reflektojë duke kthyer institucionin e Presidentit në kufijtë e kompetencave të njohura nga Kushtetuta dhe të mos ndërrmarrë asnjë veprim tjetër në shkelje flagrante të Kushtetutës.”, shkruhet më tej në projekt-rezolutën që pritet të diskutohet nesër.

    • 13:58

      Betimi i Arta Vorpsit, Basha nga Saranda: Grusht i pastër institucional, por këto janë orët e fundit të tiranisë!

      Kryedemokrati Lulzim Basha e quajti një ‘grusht’ të pastër institucional situatën e krijuar me krijimin e Gjykatës Kushtetuese. Në një reagim nga Saranda, megjithëse nuk iu referuar drejtëpërdrejt betimit të Arta Vorpsit tek një notere private e jo tek presidenti Ilir Meta, Basha tha se qytetarët kërkojnë një gjykatë Kushtetuese funksionale.

      Lulzim Basha, kryetar i PD

      “Sepse drejtësia është e kapur. Sepse Edi Rama dhe kjo qeveri kanë vetëm një qëllim, ta kapin  ose ta bllokojnë reformën në drejtësi.  Ne nuk mund ta pranojmë këtë. Kjo që po ndodh me Gjykatën Kushtetuese është një grusht i pastër institucional. Është një grusht kushtetues i cili ka për qëllim që në vend që qytetarët të kenë Gjykatën Kushtetuese për të cilën kemi dy vite, tre vite që të merren hapat për të formuar, të kenë një kukull të regjimit.  Mund t’ju duket si një debat juristësh, mund t’ju duket debat i stërholluar, por kastile i bëjnë të stërholluar që një qytetar i thjeshtë të mos e kuptojë, ta humbasn fillin, ta humbasin interesin dhe të thotë: “Kush merret me këtë punë, ja politika na futi prapë në këtë valle”. Prandaj e kanë bërë kaq të komplikuar.  Një qeveri e kapur në afera korruptive, një qeveri që do të grabisë pronat e qytetarëve, siç po bën në Himarë, në Sarandë, kudo në bregdet me koorporatën e investimeve, nuk do Gjykatën Kushtetuese të pavarur. Sepse një Gjykatë Kushtetues e pavarur i thotë “Ndal, këtyre veprimeve”. Se një Prokurori e pavarur e merr të pandehur kryeministrin, kabinetin, të gjithë pushtetin në qoftë se shkelin të drejtat themelore të qytetarëve, biznesit.  Ndaj jemi në një moment deciziv për të ardhmen tonë. Ndaj jam me shpresë se këto janë orët e fundit të një tiranie të një pakice ndaj një shumice. Për këtë ne kemi një vizion vlerash, normash, standardesh europiane, që fillon me një drejtësi të pavarur, me një Gjykatë Kushtetuese të fillojë nga detyra, të jetë një Gjykatë Kushtetuese e pavarur e formuar sipas Kushtetutës. Sepse një Gjykatë Kushtetuese e formuar sipas tekave të qeverisë nuk ka legjitimitet.” tha kreu i PD.

    • 13:42

      'Se vuri dorën mbi Kushtetutë'/ Noterja rrëfen si u betua Arta Vorpsi: Erdhi, pagoi 26 mijë lekë të vjetra, hodhi firmën e iku

      Noterja Miranda Xhemalçiu

      Noterja Miranda Xhemalçiu: Jo e hodhi firmën duke më vënë mua në djeni. Kjo është detyra ime dhe unë nuk mund ta refuzoj. U paraqit me kartë identiteti, verifikova kartën. Nuk u betua mbi Kushtetutë, nuk vuri duart mbi Kushtetutë.  Nuk mund të marr atributet e presidentit. Unë mund të verfikoj se kush është person dhe çfarë thotë. Unë legalizoj formën e Arta Vorpsit, por edhe ta refuzoj për mua do të ishte shkelje. Tarifat janë siç e ka vënë ministri. Kjo ka kushtuar 20 mijë lekë të vjetra deklarata, plus taksën e pullës, 26 mijë lekë.

      Dhe ju po të vini unë jam i detyruar të marr përsipër deklarimin. Kam bërë vetëm vërtetimin e firmës së saj, emër-mbiemër. Nuk vuri dorë mbi Kushtetutë. Bëri vetëm deklarimin emër-mbiemër. Nuk jam unë organi i që bëj këto. Unë mbaj përgjegjësi vetëm për firmën. Unë e lexova patjetër, por legalizova vetëm firmën e Arta Vorpsit. Po t’a refuzoja do të ishte shkelje. Dhe ju po të më kërkoni do e bëj. Unë bëj mbi 10 deklarata në ditë. Çdo gjë është e ligjshme, kjo është procedurë e çdo noteri. Jo moj zemër, ajo erdhi vetë. Ka 6 vite që është klientja ime. Unë s’merrem hiç me politikë. Ajo ka ardhur këtu para 6 vitesh. Kjo është qëllimi i saj  si e paraqit. Unë vërtetoj vetëm që ishte firma e Arta Vorpsit. Mund t’jua tregoj edhe juve, neni 62., gërma ë. Unë vetëm këtë bëj.

    • 13:29

      I doli kundër Arta Vorpsit, kush e detyroi Denar Bibën të fshijë postimin, nënkryetari i KQZ heq me urgjencë argumentet ligjore për shkeljen e Kushtetutës

      U pa si një qëndrim kundër i socialistëve për aktin e anëtares së re të Gjykatës Kushtetuese, Arta Vorpsi, por duket se kulisat e këtij akti janë edhe më të thella. Dosja.al raportoi më herët qëndrimin e nënkryetarit të Komisionit Qendror të Zgjedhjeve, ish-kryetar, por edhe një nga juristët më në zë në vend, Denar Biba. Përmes një postimi në rrjetet sociale, Biba dënonte aktin e Arta Vorpsit, duke e quajtur betimin e saj tek noterja, një “veprim të njëanshëm”.

      Postimi i Denar Bibës: 

      Postimi i Denar Bibes

      Por pak minuta pasi mediat paqyruan qëndrimin e Bibës, ky i fundit e ka fshirë atë në mënyrë të çuditshme. Kush e detyroi Bibën të fshihet nga “mendimet” e tij? A ishte ky një lapsus apo një lajthitje?

    • 13:26

      Betimi i Vorpsit tek noterja/ Zëri i Amerikës: Shkelje e hapur, thellon kaosin e Kushtetueses

      Arta Vorpsi

      Thellohet kaosi me emërimet në Gjykatën kushtetuese, e kthyer në një mollë sherri, mes Presidentit të Republikës Ilir Meta dhe shumicës së majtë qeverisëse. Arta Vorpsi, kandidatja e cila ishte e para në listën për vakancën e shpallur nga Kreu i Shtetit, e që sipas vendimit të botuar në Fletoren zyrtare, është shpallur automatikisht anëtare e Gjykatës Kushtetuese, ka bërë një lëvizje të papritur, duke u betuar te një notere.

      Përpara noteres Miranda Xhemalçe, ajo ka lexuar formulën e betimit: “Betohem se gjatë kryerjes së detyrave të mia, do t’i qëndroj kurdoherë besnik Kushtetutës së Republikës së Shqipërisë”. Por me vetë aktin e betimit përpara një notereje, zonja Vorpsi, duket se ka bërë një shkelje të hapur, pikërisht të Kushtetutës e cila përcakton në mënyrë fare të qartë në nenin 129 se “Gjyqtari i Gjykatës Kushtetuese fillon detyrën pasi bën betimin para Presidentit të Republikës”. Një kopje të betimit të saj, ajo ja ka dërguar dhe Presidenti Meta, ashtu dhe vetë Gjykatës Kushtetuese, pavarësisht se nuk është e qartë se cfarë vlere juridike mund të ketë një akt i tillë.

      Presidenti Meta deklaroi mbrëmë se botimi në Fletoren zyrtare sipas tij nuk ka vlerë. “Çdo botim kontrabandë në Fletoren zyrtare padyshim që nuk sjell asnjë detyrim për presidentin e Republikës”, u shpreh zoti Meta, i cili më parë, për të njejtën vakancë emëroi Marsida Xhaferllarin në tejkalim të afatit 30 ditor që i përcakton atij Ligji për Gjykatën Kushtetuese.

      Përmes zëdhënësit të tij, zotit Meta reagoi me ironi pas lajmit të betimit të zonjës Vorpsi, duke deklaruar se “nuk pengoj askënd të betohet as te noterja, as te parukierja”.

    • 13:19

      Betimi i Arta Vorpsit, reagon Dhoma e Noterëve: Xhemalçe bëri detyrën, do e bënte për çdo qytetar

      Mimoza Sadushi, kryetarja e Dhomës së Noterëve në Shqipëri, thotë se noterja Miranda Xhemalçe ka bërë detyrën duke marrë përsipër betimin e anëtares së Gjykatës Kushtetuese, Arta Vorpsi. Në një reagim për mediat, Sadushi thotë se çdo noter është i detyruar nga ligji të marrë përsipër deklarimin e një qytetari, ndërsa distancohet për të vlerësuar nëse akti ka të njëjtën vlerë ligjore si tek presidenti Ilir Meta. “Noteria ka bëre vetëm detyrën. Çdo qytetar që paraqitet në zyrën e noterit me vullnetin e tij noteri është i detyruar t’i marrë deklarimin. Kjo është e ligjshme.Nëse ky veprim është i barasvlershëm si para presidentit për ketë nuk shprehem dot. Le ta zgjidhin institucionet”-tha ajo.

    • 12:59

      Betimi i Arta Vorpsit/ Balla nuk e komenton, tregon se çfarë duhet të bëjë Kuvendi

      Taulant Balla

      Kreu i Grupit Parlamentar të PS-së Taulant Balla nuk ka dashur të komentojë veprimin e sotëm të betimit të Arta Vorpsit, anëtares së Gjykatës Kushtetuese tek noterja dhe jo te Presidenti i Republikës, Ilir Meta.

      Ai është shprehur se Kuvendi duhet të mbajë një qëndrim institucional për këtë gjë dhe shtoi se për këtë çështje do të ketë shumë komente. Ai i theksoi gazetarët se vetëm duhet të durojnë.

      Pyetja ndaj Ballës:

      A e zëvëndeson notrja betimin para presidentit Ilir Meta?

      Taulant Balla: Nuk dua të bëj një koment për këtë çështje këtu. Do të kemi komente boll, do të të ketë konferencë te kryetarëve. Në këtë kontekt të krijuar duhet një qëndrim institucional nga ana e Kuvendit. Duroni dhe do të keni një përgjigje.

    • 12:59

      PS kundër Vorpsit, Biba: Veprim i njëanshëm, Arta që njoh unë e ka marrëdhënien me emrin e saj të mirë!(REAGIMI)

      Denar Biba

      Për betimin e Arta Vorpsit tek noterja dhe jo te Presidenti i Republikës,  Denar Biba nën-kryetari i KQZ-së ka deklaruar se  ky veprim i vetëdijshem, është thjesht shfaqje e njëanshme e vullnetit të saj. Biba i ka dalë kundër Arta Vorpsit duke theksuar se mbi të gjitha e njeh shumë mirë atë dhe njohuritë që ajo ka mbi Kushtetutën.

      “Nuk kemi te bejme me betimin si anetare e ardhshme e GjK, por besoj me nje deklarate qe tregon pergjegjesine e Arta Vorpsit ne keto rrethana. Sepse Arta qe njoh une, perpara se gjithash, e ka marredhenien me emrin e saj te mire!”, shprehet ai.

      Reagimi: 

      Padrejtesisht, nje profesioniste serioze si Arta Vorpsi keto dite eshte gjetur ne qender te nje situate qe vetem serioze nuk mund te quhet.
      Ajo e di shume me mire se shume te tjere se si eshte procedura qe Kushtetuta urdheron per betimin e anetarit te Gjykates Kushtetuese. Me siguri, ky veprim i Artes, i vetedijshem, eshte thjesht shfaqje e njeanshme e vullnetit te saj per te treguar se merr persiper kete angazhim te jashtezakonshem, qe Kuvendi dhe koha ia ngarkoi. Nuk kemi te bejme me betimin si anetare e ardhshme e GjK, por besoj me nje deklarate qe tregon pergjegjesine e Arta Vorpsit ne keto rrethana.
      Sepse Arta qe njoh une, perpara se gjithash, e ka marredhenien me emrin e saj te mire!

    • 12:11

      FOTO-LAJM/ Vorpsi 'acaron' Metën, pas betimit tek noterja, gjyqtarja nis punën tek Gjykata Kushtetuese

      Pasi u betua mbi Kushtetutë në zyrën e noteres Miranda Xhemalçiu, anëtarja më e re e Gjykatës Kushtetuese, Arta Vorpsi, duket se ka në plan edhë më tej të “ftohë” marrëdhëniet me presidentin Ilir Meta.

      Vorpsi, është paraqitur po sot në zyrën e saj në Gjykatën Kushtetuese, ku siç edhe shihet në këtë foto të siguruar nga Dosja.al, Vorpsi po hyn në institucion.

      Arta Vorpsi duke hyre ne zyre

      Ajo e nis punën e saj si gjyqtare e Gjykatës Kushtetuese duke injoruar presidentin Ilir Meta. “Jam shumë i qartë për këtë çështje. Kuvendi është i mirëpritur të komunikojë zyrtarisht me institucionin e Presidentit, dhe jemi të hapur për të bashkëpunuar në respekt të kushtetutës dhe detyrimeve kushtetuese dhe kjo është një çështje e mbyllur dhe shumë e qartë”, tha Meta.

    • 12:08

      / Reagon PD: Ushtare e pushtetit të Ramës, kundër shtetit të së drejtës

      Për betimin e Arta Vorpsit para noteres si anëtare e Gjykatës Kushtetuese ka reaguar edhe PD-ja. Gazmend Bardhi është shprehur se betimi tek noteri i kandidates së vetëshpallur si anëtare e Gjykatës Kushtetutese e kthen Shqipërinë në kohët më të errëta të diktaturës komuniste. PD, thekson se Vorpsi është detyruar nga policia, si ushtare e këtij pushteti, kundër shtetit të së drejtës.

      “Të jem i sinqertë, Arta Vorpsin e njoh dhe, në vlerësimin tim profesional, nuk ka njohje kaq të ulët mbi Kushtetutën. Prandaj, kushdo që e ka detyruar të bëjë këtë veprim, thjesht e ka dëmtuar përpara opinionit publik, duke i vënë etiketën e Arta Markut, si ushtare e këtij pushteti, kundër shtetit të së drejtës.”, shprehet Bardhi.

      Reagimi i PD-së:

      “Çfarë është e mirë për Hitlerin, është ligjore.” Betimi tek noteri i kandidates së vetëshpallur si anëtare e Gjykatës Kushtetutese e kthen Shqipërinë në kohët më të errëta të diktaturës komuniste, kur gjithçka dhe kushdo varej nga vullneti i partisë, jo shteti i së drejtës. Me aktin partiak noterial kandidatja e përdorur nga Edi Rama provon se nuk mund të jetë as ligjërisht dhe as moralisht garante e Kushtetutës. Neni 129 i Kushtetutës është i qartë: “Gjyqtari i Gjykatës Kushtetuese fillon detyrën pasi bën betimin para Presidentit të Republikës.”

      Tek noteri mund të bësh edhe “njësimin me origjinalit” të Ardian Dvoranit me Edi Ramën, por kjo nuk të mundëson ligjërisht ushtrimin e detyrës si anëtar i Gjykatës Kushtetuese. Të jem i sinqertë, Arta Vorpsin e njoh dhe, në vlerësimin tim profesional, nuk ka njohje kaq të ulët mbi Kushtetutën. Prandaj, kushdo që e ka detyruar të bëjë këtë veprim, thjesht e ka dëmtuar përpara opinionit publik, duke i vënë etiketën e Arta Markut, si ushtare e këtij pushteti, kundër shtetit të së drejtës. Me këtë skenar për shkeljen skandaloze të Kushtetutës, në vend që të përmbushë kushtet gjermane për standardet europiane të drejtësisë së pavarur, Edi Rama po zbaton parimin nazist “Çfarë është e mirë për Hitlerin, është ligjore.”

    • 11:59

      Tedi Blushi ironizon Arta Vorpsin: Meta nuk ndalon askënd të betohet as tek parukierja

      Tedi Blushi dhe Arta Vorpsi

      Tedi Blushi, zëdhënësi  Presidentit Ilir Meta ka reaguar menjëherë pas betimit të Arta Vorpsit, anëtares së Gjykatës Kushtetuese para noteres. Ai ka theksuar se Presidenti i vendit Meta nuk ndalon askënd të betohet as tek noterja, as tek parukierja.“Të dashur gazetarë, Lidhur me pyetjet tuaja për një lajm qesharak që qarkullon në media, dua t’ju sqaroj se: Presidenti i Republikës Sh.T.Z Ilir Meta nuk ndalon askënd të betohet as tek noterja, as tek parukierja. Presidenti Meta është betuar me dorë mbi Kushtetutë dhe për të Shqipëria dhe shqiptarët janë të parët.”, shprehet Tedi Blushi. 

    Një Koment në “Arta Vorpsi injoron Presidentin, s’betohet para Metës por tek noterja private, shkresën ia nis me Postë

    1. Noterja deklaron: Nuk u betua mbi Kushtetutë, nuk vuri duart mbi Kushtetutë. Nuk mund të marr atributet e presidentit.

      Ndersa ne deklaraten e bere apo dorezuar perpara Noteres, Znj. Vorpsi deklaron nder te tjera: ….. me doren e vendosur ne KUSHTETUTE, betohem:"

      Ky eshte skandal dhe karagjozllik, nje deklarim i rreme dhe nje fyerje per kete veprim SOLEMN.

    Shto Koment