Aktualitet

Ankesat e fermerëve, Çuçi: Bujqësia nuk është prekur nga “Covid-19”, kemi rritje

Çuçi deklaroi se Bujqësia ka pasur probleme vetëm në ditët e para të vendosjes së karantinës në mars.
Featured image of article: Ankesat e fermerëve, Çuçi: Bujqësia nuk është prekur nga “Covid-19”, kemi rritje Blendi Çuçi, ministër i Bujqësisë

TIRANË- Përveçse shëndetin e njerëzve, koronavirusi dhe kriza që e ka shoqëruar ka goditur rëndë edhe ekonominë e bizneset. Prej kohësh është thënë që kriza e krijuar nga koronavirusi ka goditur edhe bujqësinë, pasi fermerët janë ankuar se kanë probleme me lëvizjen për shkak të kufizimeve të vendosura. Gjithsesi, sipas ministrit të Bujqësisë dhe Zhvillimit Rural, ky sektor nuk është prekur nga kriza e koronavirusit, përkundrazi kjo situatë sipas tij e ka ndihmuar bujqësinë.

Gjatë një interviste në “Byro Politike” me gazetaren Juli Xhokaxhi, Çuçi deklaroi se Bujqësia ka pasur probleme vetëm në ditët e para të vendosjes së karantinës në mars. Sipas tij, jo vetëm që në bujqësi nuk ka pasur asnjëlloj destabilizimi si pasojë e Covid-19, por përkundrazi ka pasur edhe rritje të eksportit. Sa i përket ankesave nga fermerët, ai u shpreh se “ankesa do të ketë gjithmonë, ka probleme, por nuk lidhen me Covid-19. Deklaratat e ministrit i mbështeti edhe Alban Zusi, kryetar i Shoqatës së Industrialistëve Ushqimorë. Zusi konfirmoi se “kemi pasur një periudhë të vështirë vetëm dy-tre javët e para në mars.”

Ai u shpreh: “Në fakt unë e kam thënë se bujqësia dhe industria agro-ushqimore  janë sektorët më pak të prekur. Madje ka sektorë që janë më mirë se ç’kanë qenë vjet. Sektori i eksportit të fruta-perimeve është me lart, unë jam i detyruar të konfirmoj të gjitha ato që tha ministri. Gjatë kësaj kohe njerëzit duhej që të ushqeheshin.”  

Ndërsa, sa i përket fermerëve që thonë të kundërtën, ministri i Bujqësisë thotë se “këto gjëra janë lehtësisht të verifikueshme.”

Për më shumë bëhu pjesë e grupit më viral në Facebook, Dosja.al

Bledi Çuçi: “Këto janë gjëra lehtësisht të verifikueshme. Nëse doni verifikoni, shkoni nesër dërgoni gazetarët për të marrë raportet nga dogana. Krahasojini me 2019. Ndërkohë që të më dalë një person i vetëm që është penguar të lëvizë produktet e veta nga fusha në tregje dhe unë jap dorëheqjen. Javën e parë ka pasur një lloj turbulence për shkak të situatës. Në total nuk ka pasur asnjë ditë ndërprerje, as në prodhim as qarkullim produktesh.”

Po peshkimi që ka qenë i bllokuar?

Bledi Çuçi: “Nuk ka qenë as peshkimi totalisht i bllokuar, peshkarexhat janë lejuar të dalin, por eshtë e vërtetë se peshkimi ka pas probleme për shkak të uljes së kërkesës në tregje si rezultat i mbylljes së restoranteve. Ka rënë kërkesa në tregje. Ka pasur edhe rënie të prodhimit, tani edhe ata e kanë marrë veten.” 

(Marrë nga Abcnews.al)

Shto Koment