Aktualitet

30 vite nga masakra e 2 prillit! Përkujtohen 4 martirët e demokracisë, zhvillohet ceremonia në Shkodër (REAGIMET)

Më 2 prillit 1991 në qytetin e Shkodrës u vranë 4 dëshmorë të  Demokracisë. Gjatë protestës masive, manifestuesit dogjën zyrat e Komitetit Qendror të PPSH-së në qytetin verior.
Featured image of article: 30 vite nga masakra e 2 prillit! Përkujtohen 4 martirët e demokracisë, zhvillohet ceremonia në Shkodër (REAGIMET) Ilir Meta, Lulzim Basha dhe Ditmir Bushati

TIRANË– 30 vite më parë në 2 prill të vitit 1991 në Shkodër mbetën martirë të demokracisë Arben Broci, Nazmi Kryeziu, Besnik Ceka dhe Bujar Bishanku, të ekzekutuar nga regjimi monist i kohës. Sot pas 30- vitesh, kjo ngjarje mbetet një ndër më të rëndësishmet të asaj periudhe që solli rrëzimin e komunizmit. Ditën e sotme është zhvilluar në Shkodër një ceremoni në monumentin e 2 prillit. Të pranishëm ishin familjarë të 4 dëshmorëve si dhe presidenti i vendit Ilir Meta. Po ashtu, Jozefina Topalli ishte e pranishme. Pas largimit të saj, vëllai i Nazmi Kryeziut hoqi lulet që u vendosën nga politikania.

Presidenti Ilir Meta tha për gazetarët e pranishëm se bëri çmos që të ishte prezent ditën e sotme në Shkodër, ndërkohë Basha dhe Helidon Bushati kanë reaguar për këtë ditë me anë të postimeve në ‘Facebook’.

Çfarë ka ndodhur në 2 Prill 1991?

Për më shumë bëhu pjesë e grupit më viral në Facebook, Dosja.al

Më 2 prillit 1991 në qytetin e Shkodrës u vranë 4 dëshmorë të  Demokracisë. Gjatë protestës masive, manifestuesit dogjën zyrat e Komitetit Qendror të PPSH-së në qytetin verior. Kjo ngjarje konsiderohet dhe si masakra e fundit e komunizmit në Shqipëri, ku mes turmës që protestonte u vranë me snajperë nga forcat e sigurimit, Bujar Bishanaku, Arben Broci, Nazmi Kryeziu dhe Besnik Ceka.

(a.b)/dosja.al

  • 11:48

    Topalli vendos lule te monumenti i 2 prillit në Shkodër, qytetari e largon nga vendi


    Një incident ka ndodhur ditën e sotme në Shkodër, gjatë ceremonisë së përkujtimit të 30-vjetorit të masakrës së 2 prillit 1991. E pranishme ishte dhe Jozefina Topalli e cila vendosi lule në monumentin e 2 prillit.Mirëpo, një nga personat e pranishëm, pasi Topalli u largua shkoi dhe hoqi lulen nga varri. Personi që hoqi lulet ishte vëllai i Nazmi Kryeziut, një prej martirëve të 2 prillit.

  • 10:34

    ‘Kam bërë çdo gjë që të jem prezent këtu’/ Meta: Çdo problem që kam do ta zgjidh duke qënë në krye të demokracisë


    Presidenti i vendit, Ilir Meta deklaroi para gazetarëve se ka bërë çdo gjë që të ishte prezent ditën e sotme në ceremoninë përkujtimore të vdekjes së katër martirëve në Shkodër. Meta tha se problemet do ti zgjidhë duke qënë në krye të demokracisë.

    DEKLARATA:

    META: Unë kam bërë cdo gjë për të qënë sot prezent këtu, pasi vendi është në një situatë kritike, por do të dalim me sukses.  Unë cdo problem që kam do ta zgjidh duke qënë në krye të demokracisë. Sot do të nderojmë dhe kujtimet e klerikëve të Shkodrës që u martirizuan.

    Gazetari: Cfarë keni për të thënë për akuzat e Topallit?

    Meta: Nuk e di se cila është përgjegjësia ime, unë jam një student i dhjetorit dhe e kam thënë dhe më parë, se nuk jam i persekutuar, por kam qënë i bindur se nuk mund të tolerohet më. Kam qënë në anën e demokracisë, pro integrimit europian. Nuk kam qënë zëdhenës i kapjes së shtetit. Dhe atëherë qarkullonin shumë barcaleta apo jo. Tani kemi fuqi, votën tonë, ta përdorim për të mos lejuar largimin e shkodranëve dhe vlonjatëve.

  • 10:13

    Ceremonia e 4 martirëve të demokracisë në Shkodër, Meta: Shqipëria vuan nga mungesa e zgjedhjeve të lira dhe kapja e shtetit


    Presidenti Ilir Meta ishte i pranishëm ditën e sotme në Shkodër, aty ku mori pjesë në ceremoninë përkujtimore të 30-vjetorit të vrasjes së Martirëve të Demokracisë.Pas ceremonisë ai dha një deklarataë për gazetarët për të cilat tha se kujtimi i katër martirëve është i paharruar e se amanetet e tyre duhen çuar deri në fund. Kreu i shtetit tha më tej se Shqipëria vuan nga mungesa e zgjedhjeve të lira dhe nga kapja e shtetit.

    DEKLARATA:Sot bëhen 3 dekada, ku 4 djemtë tanë të mirë u vranë padrejtësisht, pikërisht se dolën në mbrojtje të demokracisë. Sot jemi këtu për të nderuar kujtimin e tyre të paharruar, por edhe për tu angazhuar se do ta çojmë deri në fund amanetin e tyre dhe dëshmorëve të tjerë që kanë rënë për demokraci në Shqipëri. Ende Shqipëria vuan nga mungesa e zgjedhjeve të lira, dhe kapja e shtetit që ka marrë peng Integrimin, është momenti që të gjithë në 25 Prill të vendosim në shina demokracinë. Unë jam i bindur se Shkodra do të jetë në krye të këtij marshimi, siç ka qenë dhe në kohërat më të errëta të vendit tonë. Unë kam pasur ftesën si president për të qenë sot këtu, sepse ky është një moment tepër i rëndësishëm, pasi vendi është në një situatë kritike në një udhëkryq, nga e cila do të dalim me sukses, falë ndërgjegjësimit të qytetarëve. Unë çdo përgjegjësi që kam do ta shlyej duke qenë në krye të mbrojtjes së demokracisë në 25 Prill, kështu do të ndërojmë të gjithë ata patriotë që u martirizuan.

  • 8:52

    30 vite nga vrasja e 4 të rinjve në Shkodër, Basha: Heronjtë e gjithë Shqipërisë! Emrat e 4 martirëve të asaj dite të zymtë kumbojnë fort në ndërgjegjen tonë

    Kryetari i Partisë Demokratike, Lulzim Basha, ka kujtuar 30 vjetorin e vrasjes së 4 të rinjve në qytetin e Shkodrës. Me anë të një postimi të bërë në ‘Facebook’, Basha shkruan se të rinjtë që humbën jetën guxuan t’ia thonë në sy dhe publikisht diktaturës në panik se koha e saj kishte përfunduar.

    Basha i quan ata heronjtë e Shqipërisë, si dhe shkruan se emrat e 4 martirëve të asaj dite të zymtë kumbojnë fort në ndërgjegjen tonë.

    POSTIMI:

    Si sot 30 vjet më parë, më 2 prill 1991, regjimi gjakatar i Partisë së Punës vrau pa mëshirë dhe qëllimisht 4 djem të rinj, bij të Shkodrës dhe pishtarë të demokracisë.
    Arben Broci, Nazmi Kryeziu, Bujar Bishanaku dhe Besnik Ceka u qëlluan nga falangat e regjimit që po jepte shpirt, sepse guxuan t’ia thonë në sy dhe publikisht diktaturës në panik se koha e saj kishte përfunduar dhe shqiptarët kishin zgjedhur lirinë dhe Europën. Ai lumë njerëzish të lirë që vërshoi në rrugët dhe sheshet e Shkodrës dëshmoi se edhe në momentet më të vështira dhe përballë tiranisë më të pashpirt, shqiptarët janë të gatshëm të përqafojnë lirinë me çdo çmim. Heronjtë e 2 prillit janë heronjtë e gjithë Shqipërisë. Dëshira, guximi dhe përpjekja për ta bërë Shqipërinë një vend të lirë, ngritën themelet e ndërtimit të një shteti demokratik. Përpjekje nga e cila ne nuk kemi hequr dorë asnjëherë dhe për të cilën punojmë çdo ditë. Kjo ditë i jep një kuptim të veçantë dhe lëvizjes që ne kemi nisur sot. 30 vite më pas, 2 prilli, emrat e 4 martirëve të asaj dite të zymtë kumbojnë fort në ndërgjegjen tonë dhe na japin sigurinë se jemi në rrugën e drejtë dhe në rrugën e fitores mbi të keqen, të ndryshimit që po vjen për çdo shqiptar, në rrugën e Shqipërisë si gjithë Europa. Lavdi përjetë martirëve të 2 prillit!

  • 8:38

    30 vite nga masakra e 2 prillit, Bushati: Kemi një amanet për të çuar deri në fund!

    Drejtuesi politik i qarkut Shkodër, Helidon Bushati me anë të një postimi në ‘Facebook’ e ka kujtuar datën 2 prill si një dëshmi që Shkodra e ka paguar shtrenjtë, me jetën e bijve të saj për një Shqipëri të lirë. Bushati shkruan se kjo ditë është kujtesa se ka një amanet për t’u çuar deri në fund. ‘Është premtimi që duhet t’i bëjmë njeri-tjetrit se historia nuk do të përsëritet.’- shkruan Bushati.

    POSTIMI: 30 vjet më parë, Arben Broci, Nazmi Kryeziu, Bujar Bishanaku dhe Besmir Ceka u vranë dhe ranë në aktin dhe ëndrrën e tyre për liri e demokraci. 2 Prilli është dëshmia se Shkodra thirrjet e saj për një Shqipëri të lirë i ka paguar shtrenjtë, me jetën e bijve të saj. Është kujtesa sesa i ligsht e i pakursyer ka qënë regjimi me Shkodren. Akti i katër dëshmorëve tanë është edhe shpresa se shpirti i lirisë do të jetojë me Shkodren. Nderimi më i mirë për vëllezërit tanë të rënë është zotimi se Shkodra nuk do t’i përkulet kurrë së keqës. Është premtimi që duhet t’i bëjmë njeri-tjetrit se historia nuk do të përsëritet. 2 Prilli është edhe kujtesa se kemi një amanet për të çuar deri në fund. Amanetin e vëllezërve tanë, amanetin e Shkodrës së Lirisë dhe Demokracisë. Lavdi heronjve të 2 Prillit!

Shto Koment